O‘zbekistonning Qanot Sharq Airlines xususiy aviakompaniyasi Amerika kompaniyasidan foydalanilgan ikkita Airbus A320-200 samolyotini uzoq muddatli foydalanish uchun ijaraga oldi. Bu haqda kompaniya saytida ma’lum qilingan.
Samolyotlarni yetkazib berish 2021-yilning mart oyiga rejalashtirilgan. Bu O‘zbekiston startap aviakompaniyasi parkidagi dastlabki ikkita samolyot bo‘ladi.
Qayd etilishicha, u hududiy aeroportlardan Istanbul, Anqara (Turkiya), Dubay (BAA), Jidda, Madina (Saudiya Arabistoni), Moskva, Sankt-Peterburg (Rossiya) va Olmaota (Qozog‘iston) kabi xalqaro yo‘nalishlarga parvoz qiladi.
2019-yilning sentabrida Qanot Sharq Airlines xususiy kompaniyasi Superjet samolyotlariga shartnoma (yetkazib berish haqidagi bitimni nazarda tutadi) imzolagani haqida xabar berilgan edi. Aviakompaniya, shuningdek, Rossiyaning Sukhoi Civil Aircraft Company (SСАC) kompaniyasidan uchta Superjet 100 samolyotini lizingga olishni rejalashtirgandi.
2019-yilning avgustida Qanot Sharq Airlines muassisi Nosir Abdug‘afforov kompaniya boshlanishiga 2-3 ta samolyot olish va o‘z flotini muntazam ravishda kengaytirishni rejalashtirayotganini aytgandi.
“O‘tgan yil noyabrda prezident farmoni chiqqanidan so‘ng (“O‘zbekiston Respublikasining fuqaro aviatsiyasini tubdan takomillashtirish chora-tadbirlari to‘g‘risida”) biz aviakompaniyani hududiy aviatashuvchi sifatida qayta jonlantirishga qaror qildik. Biz hududiy texnika ishlab chiqaruvchi uchta yetakchi — Embraer (Braziliya), Bombardier (Kanada) va Sukhoi (RF) kompaniyalari bilan uchrashdik. Parvozlar geografiyasi, parvoz jadvali ishlab chiqilmoqda. Shuningdek, aviakompaniyaning tashkiliy tuzilmasi tayyorlanmoqda”, — degan edi u.
Ma’lumot uchun, Qanot Sharq Airlines 1998-yilda ro‘yxatga olingan hamda yuk va yo‘lovchi aviatashuvlariga ixtisoslashgan. 2003-yildan 2012-yilgacha kompaniya “O‘zbekiston havo yo‘llari” MAKdan Il-76 samolyotlarini ijaraga olgan va O‘zbekistondagi birinchi xususiy aviakompaniya o‘laroq o‘z charter reyslarini amalga oshirgan. Kompaniya 150 mingdan ortiq yo‘lovchi tashigan. Barcha Il-76 samolyotlari O‘zbekiston Mudofaa vazirligiga o‘tkazilgach, Qanot Sharq Airlines’ning ekspluatantlik sertifikati to‘xtatilgan.
Izoh (0)