Bosh prokuratura hamda DXX tomonidan o‘tkazilgan tezkor tadbirlar davomida Andijonning Jalaquduq tumanida o‘zini kadastr xodimi deb tanishtirgan shaxs va Buxoroning Jondor tumanida kadastr filiali mutaxassisi pora bilan qo‘lga tushdi. Bu haqda Bosh prokuratura ma’lumotlariga tayanib “Gazeta.uz” xabar bermoqda.
Jalaquduqdagi holatda muqaddam firibgarlik jinoyati uchun sudlangan, ishsiz M.K. fuqarolarga o‘zini tuman Yer tuzish va ko‘chmas mulk kadastri davlat korxonasi xodimi deb tanishtirgan. Fuqaro M.A. va uning qo‘shnisiga uy-joy qurish uchun “Haqiqat” MFY hududidan har biriga 6 sotixdan, 12 sotix yer maydoni olib berishini aytib, evaziga 1300 dollarni firibgarlik yo‘li bilan olgan vaqtida ashyoviy dalil bilan ushlangan.
Jondorda Yer tuzish va ko‘chmas mulk kadastr davlat korxonasi Jondor tumani filiali mutaxassisi F.S. R. ismli fuqaroni uning 23 sotix yer maydonini dehqon xo‘jaligi nomiga rasmiylashtirish masalasini yuqori lavozimda ishlovchi tanishlari orqali hal qilib berishiga ishontirgan. Buning evaziga esa oldindan kelishilgan 400 dollardan 100 dollar va 2 million so‘mni olgan vaqtda ashyoviy dalil bilan ushlangan.
Yuqoridagi holatlar yuzasidan Jinoyat kodeksining 168-moddasi (firibgarlik), 28-moddasi (jinoyat ishtirokchilarining turlari), 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Mavzuga doir:
- Farg‘onada 8 gektar yer olishda yordam berish evaziga 8 ming dollar olgan sobiq kadastr xodimi ushlandi
- Andijonda sanoat zonasidan yer olib berishni va’da qilib, pora olgan sobiq kadastr xodimi qo‘lga olindi
- Samarqandda fuqaroga 2 ming dollar evaziga yerga egalik huquqini olib berishni va’da qilgan kadastr xizmati xodimi ushlandi
Izoh (0)