Toshkent hokimligi kommunal xizmatlar, yomon yo‘llar va shahardagi boshqa muammolar bo‘yicha murojaatlarni qabul qiluvchi servisni ishga tushirdi

Toshkent shahar hokimligi shahar infratuzilmasi, uy-joy kommunal xizmat ko‘rsatish va obodonlashtirish sohasidagi muammolarga oid murojaatlarni qabul qilishga mo‘ljallangan servisni ishga tushirdi.

“Toshkent shahar hokimligi tomonidan tashkil qilingan ‘Xalq nazorati’ xizmati orqali siz shahar infratuzilmasi, uy-joy kommunal xizmat ko‘rsatish va obodonlashtirish sohasidagi muammolar to‘g‘risida murojaat qoldirishingiz mumkin. Xizmatdan saytimiz hamda Android va iOS foydalanuvchilari mobil ilova orqali foydalanishi mumkin”, — deyiladi xabarda.

Servisdan foydalanish uchun dastlab ro‘yxatdan o‘tish, kerakli ma’lumotlarni kiritish, pasportni skaner qilish kerak — smartfon avtomatik tarzda ro‘yxatdan o‘tkazadi. Shundan so‘ng murojaat uch bosqichda yuboriladi. Bunda muammo toifasi va mavzusi tanlanadi hamda unga ta’rif beriladi.

Bundan tashqari, bartaraf etilgan muammo yuzasidan ijrochiga baho berish ham mumkin. Fuqarolar tomonidan berilgan baholar natijalariga ko‘ra, hosil bo‘lgan umumiy ko‘rsatkich bilan “Reyting” bo‘limida tanishsa bo‘ladi.