Xorazm viloyatining Urganch shahridagi ohak sexi gaz ta’minotiga noqonuniy ulanib olgani aniqlandi, deya xabar bermoqda Energetika vazirligi.
Ma’lum qilinishicha, 2021-yilning 15-fevralidan 16-fevraliga o‘tar kechasi “Hududgaz Xorazm” gaz ta’minoti filialining moddiy resurslardan oqilona foydalanish va korrupsiyaga qarshi siyosatni amalga oshirish bo‘limi DXXning Xorazm viloyati boshqarmasi xodimlari bilan hamkorlikda Urganch tumanida tabiiy gazdan noqonuniy foydalanish holatlarini aniqlash bo‘yicha reyd tadbirlari o‘tkazdi.
Tekshiruv davomida Urganch tumanining Begovot qishlog‘i, “Qo‘ng‘irot” mahallasida joylashgan ohak ishlab chiqarish sexida yashirin yo‘llar bilan, tabiiy gaz hisoblagichisiz, yuqori bosimli gaz tarmog‘iga D-50 millimetr bo‘lgan polietilen quvur yordamida noqonuniy ulanib, 10 dona qo‘lbola yondirgichdan foydalangan holda ohak pishirilayotganligi aniqlandi.
Ta’kidlanishicha, ushbu ohak ishlab chiqarish sexi 2020-yilning qish mavsumida kafolatlanmagan iste’molchi sifatida tabiiy gaz ta’minotidan uzilgan. Hozirda mazkur iste’molchi tabiiy gaz tarmog‘idan ajratilgan. Hisob-kitoblarga ko‘ra, gaz ta’minoti tashkilotiga yetkazilgan zarar miqdori 1,4 milliard so‘mni tashkil etdi.
Bundan avval fuqarolarning gazga noqonuniy ulanishi “Hududgaz Samarqand” gaz ta’minoti filialiga 393 million so‘m zarar yetkazgani, Buxoroda portlash sodir bo‘lgan ko‘p qavatli uyda tabiiy gaz bo‘yicha sinovlar tegishli idoralar ruxsatisiz amalga oshirilgani hamda O‘zbekistonda elektr energiyasi va tabiiy gaz bozorini tartibga soluvchi organ tashkil etilishi haqida xabar berilgandi.
Izoh (0)