O‘zbekistonda 12 mingga yaqin xorijiy kapital ishtirokidagi korxonalar borligi ma’lum qilindi

Davlat statistika qo‘mitasi ma’lumotlariga ko‘ra, 2021-yilning 1-fevral holatiga ko‘ra, O‘zbekistonda xorijiy kapital ishtirokida faoliyat ko‘rsatayotgan korxonalarning soni 11 919 tani tashkil etmoqda.

Shulardan 5724 tasi qo‘shma korxona, 6195 tasi xorijiy korxonalardir. Ularning eng ko‘pi — sanoat (3981 ta) va savdo (3148 ta) sohalaridagi korxonalar.

Qurilish sohasida bunday korxonalar soni 966 ta, qishloq, o‘rmon va baliqchilik xo‘jaligida 690 ta, yashash va ovqatlanish bo‘yicha xizmatlarda 507 ta, tashish va saqlashda 322 ta, axborot va aloqa sohasida 321 ta, sog‘liqni saqlash va ijtimoiy xizmat ko‘rsatish sohasida esa 174 tani tashkil etmoqda.

Hududlar kesimida xorijiy kapital ishtirokida faoliyat ko‘rsatayotgan korxonalarning soni quyidagicha:

• Toshkent shahri — 7017 ta;
• Toshkent viloyati — 1319 ta;
• Samarqand viloyati — 590 ta;
• Farg‘ona viloyati — 460 ta;
• Surxondaryo viloyati — 430 ta;
• Andijon viloyati — 348 ta;
• Buxoro viloyati — 298 ta;
• Namangan viloyati — 263 ta;
• Navoiy viloyati — 240 ta;
• Qashqadaryo viloyati — 220 ta;
• Jizzax viloyati — 206 ta;
• Sirdaryo viloyati — 186 ta;
• Xorazm viloyati — 177 ta;
• Qoraqalpog‘iston Respublikasi — 165 ta.