“Hukumat o‘z amaldorlarini to‘g‘ri tarbiyalay olishi kerak” — adliya vaziri korrupsiya illati haqida

Adliya vaziri ishtirokida 15-fevral, dushanba kuni o‘tkazilgan matbuot anjumanida Ruslanbek Davletov korrupsion holatlar asosan amaldorlar bilan bog‘liq bo‘lgan bo‘g‘inda kuzatilayotganini ta’kidladi, deya xabar bermoqda “Daryo” muxbiri.

“Hamma aytadiki, jamiyat o‘zini o‘zi tarbiyalay oladimi? Men o‘ylaymanki, birinchidan, bu davlat va hukumatning mas’uliyati. Odamlarga shuni to‘g‘ri tushuntirish, yangi g‘oyalarni kiritish, standartlarni joriy qilish kerak. Chunki korrupsiya asosan qayerda bo‘lyapti? Davlat ishtirok etgan bo‘g‘inda bo‘lyapti. Ya’ni amaldorlar bilan bog‘liq bo‘lgan bo‘g‘inda bo‘lyapti. Shuning uchun, birinchi navbatda, hukumat o‘zining amaldorlarini to‘g‘ri tarbiyalay olishi kerak. Bu signallarni jamiyatga yuborishi, ular keyin qabul qilinib, kerak bo‘lsa, o‘zimizning jamiyatda yurish-turish qoidalarimiz ham shunga qarab o‘zgarishi lozim. Ya’ni bu mentalitet bilan bog‘liq bo‘lgan korrupsiya. Koreya ham o‘ziga yarasha milliy-an’anaviy munosabatlaridan korrupsiyani yo‘qotish maqsadida voz kecha olgan va buning uchun hukumat juda katta ishlarni qilgan”, — dedi Davletov.

Avvalroq Ruslanbek Davletov jamiyat rivojlanishiga to‘sqinlik qiladigan milliy an’analardan voz kechish kerakligi haqida gapirib, “Mehmondo‘stlik, o‘zbekchilik, degan gaplar ko‘pincha salbiy ma’noda ishlatilayotgan holatlar kuzatilyapti. Aslida, o‘zbekchilikning zamirida beg‘ubor g‘oyalar yotishi kerak”, degan edi.

Shuningdek, u jamiyatda korrupsiyaga nisbatan toqatsizlik oshib, nafrat o‘sganini ham ta’kidlagandi.