Farg‘onada 2020-yil davomida jinoyat ishlari bo‘yicha sudlar tomonidan 3645 nafar shaxsga nisbatan 2755 ta ish bo‘yicha hukm chiqarilgan. Bu haqda Farg‘ona viloyati sudida o‘tkazilgan matbuot anjumanida ma’lum qilindi, deb xabar berdi “Daryo” muxbiri Azizjon Ermatov.
Viloyatda sudlar tomonidan o‘tgan bir yil davomida 26 ta ish bo‘yicha 33 nafar shaxs oqlangan va reabilitatsiya qilingan. 480 nafar shaxs sud zalidan ozod qilingan, 188 nafari esa sud zalidan qamoqqa olingan. 882 nafar shaxsga ozodlikdan mahrum qilish va 1025 nafar shaxsga axloq tuzatish ishlari jazosi tayinlangan, 122 nafar shaxsga shartli hukm o‘qilgan.
2019-yilga nisbatan ayrim jinoyat turlari, xususan, bosqinchilik, o‘zlashtirish yoki rastrata yo‘li bilan talon-toroj qilish, mansab soxtakorligi, transport vositasini olib qochish hamda transport vositalari harakati yoki ulardan foydalanish xavfsizligi qoidalarini buzish kabi jinoyatlar uchun sudlanganlik ko‘rsatkichlari kamaygan. Qo‘shmachilik qilish yoki fohishaxona saqlash, haqorat qilish, talonchilik, firibgarlik, o‘g‘rilik, taqiqlangan ekinlarni yetishtirish, giyohvandlik vositalari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash kabi jinoyatlar uchun sudlanganlik holatlari ko‘paygan.
Hisobot davrida yarashuv institutining samarali qo‘llanilishi natijasida 1495 ta jinoyat ishi tugatilgan va 1569 nafar shaxs jinoiy javobgarlikdan ozod etilgan. Shuningdek, 4 nafar shaxs ozodlikdan mahrum qilish, 538 nafar shaxs ozodlikni cheklash, 206 nafar shaxs muayyan huquqdan mahrum qilish, 1356 nafar shaxs axloq tuzatish ishlari jazosini o‘tashdan muddatidan ilgari shartli ozod qilingan.
Izoh (0)