Super yengil vazn toifasida harakat qilayotgan o‘zbekistonlik bokschi Bektemir Meliqo‘ziyev (7-0, 6 KO) yarim og‘ir vazn toifasida sobiq Jahon chempioni Sergey Kovalyovni (34-4-1, 29 KO) nokaut qilishga qodir ekani haqida gapirdi.
“O‘ylashimcha, Kovalyov ham Fitchning holatiga tushardi — men uni nokaut qilardim. Balki, buning uchun ko‘proq vaqt talab qilinar edi. Kovalyovning darajasi ancha yuqori, u kuchli raqiblar bilan jang qilgan.
U uch karra Jahon chempioni, biroq jang xuddi Fitchga qarshi bahs kabi bo‘lar edi”, — deydi Meliqo‘ziyev.
Shuningdek, o‘zbekistonlik bokschi rossiyalik hamkasbining o‘ziga nisbatan ishlatgan haqoratli gaplariga ham munosabat bildirar ekan, Kovalyoning so‘zlariga javob qaytarmasligi, bu uning tarbiyasiga to‘g‘ri kelmasligi haqida aytdi.
“Men yoshi katta insonlarni juda hurmat qilaman. Mening tarbiyam shunday. Bahslashish u yoqda tursin, xato gapirsa ham indamasdan turib hurmat qilaman. Mendan boshqalarning xatosini gapirishni so‘ramang, men bunga qodir emasman”, — deydi Meliqo‘ziyev.
Eslatib o‘tamiz, 14-fevral kungi jangda Meliqo‘ziyev Morgan Fitchni (19-5-1, 8 KO) uchinchi raundda nokautga uchratgan holda navbatdagi g‘alabasini nishonladi. Meliqo‘ziyev aslida 30-yanvar kuni Kovalyov bilan jang qilishi lozim edi. Biroq Kovalyovda doping aniqlangani bois jang bekor qilingandi.
Avvalroq Kovalyov Bektemirni ilk to‘qnashuvdayoq yanchib tashlashini aytgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)