“Uning zarbalaridan so‘ng darvozabonlar to‘p qaysi tomonga uchayotganini tushunmasdi”. Dunyo futboli yulduzlari Alessandro del Pyero haqida

O‘tgan asrning 90-yillarida xuddi hozirgidek ikki hujumchi katta sahnaga chiqqandi va davrani hech kimga berishni istamasdi. Bular – Ronaldo va Alessandro del Pyero edi. Agar braziliyalik “so‘yloq” terma jamoa hamda “Barselona”, “Inter”, “Real” kabi klublaridagi o‘yinlari bilan tanilgan bo‘lsa, del Pyero deyarli butun faoliyatini “Yuventus”da o‘tkazgan. Alessandro aynan Turin klubi va Italiya terma jamoasi safidagi o‘yinlari orqali tom ma’noda afsonaga aylanadi. Jahon Chempionatidan tortib to Chempionlar Ligasigacha bo‘lgan musobaqalarda g‘olib chiqqan del Pyero haqida qancha gapirsa ham kamlik qiladi. Uning o‘zi va o‘yiniga esa faqat del Pyero darajasidagi va u bilan birga to‘p surganlargina baho berishi mumkin. Quyida taniqli (sobiq) futbolchilarning afsonaviy del Pyero haqidagi iqtiboslari taqdim etiladi.

Ha, Italiya chempionati ajoyib futbolchisini yo‘qotdi. Ammo men Sandroning o‘z tanlovidan mamnunligini bilaman. Barchamiz uning qarorini hurmat qilishimiz kerak. U shu yo‘lni tanladi va men Avstraliyaning (faoliyatining so‘ngida, 2012-yilda “Sidney” klubiga o‘tadi – “Daryo”) vaziyatni yaxshi tomonga o‘zgartira oladigan mamlakat ekaniga aminman.

Kristian Viyeri

Alessandro – avlodimizning kumiri. Va men sizga aniq aytamanki, u jarima zarbalarini mendan yaxshiroq tepadi. Bu shunchaki gap emas. Men yaqin masofadan zarba berishni afzal ko‘raman, Ale esa uzoqdan zarba beradi. Del Pyeroning zarbalari juda g‘alati yo‘nalishda harakatlanadi, ammo juda tez. Uning zarbalaridan keyin darvozabonlar shunchaki to‘p qaysi tomonga uchayotganini tushunmasdi.

Ronaldinyo

Del Pyero 600 ta ajoyib o‘yin o‘tkazgan. U superprofessionallar davrida butun muhabbatini futbolga bergan haqiqiy maestrodir. Men uchun Alessandro nafis futbol va sevimli jamoasiga borini bergan o‘yinchi namunasidir.

Yoxan Kroyff

Alessandro, sen men o‘xshashga harakat qilgan namuna eding. Sen chempionsan va doimo meni hayratlantirgansan.

Krishtianu Ronaldu

Azizim Aleks, sening Avstraliyada yangi sarguzashtlaringni boshlashingdan xabarim bor (del Pyero faoliyatining so‘ngida, 2012-yilda “Sidney” klubiga o‘tadi – “Daryo”). Hozirda birga bosib o‘tgan yo‘llarimiz xotiramda aylanmoqda. Biz bir-birimizga qarshi juda ko‘p o‘yin o‘tkazdik va jamoalarimizning haqiqiy yetakchilari sifatida biz har doim bir-birimizga hurmat-ehtirom his qilardik. Rimlik sifatida ba’zi uchrashuvlarni eslashim menga azob beradi, ammo hech narsa senga bo‘lgan munosabatni o‘zgartira olmaydi. Bu xayrlashuvni yozayotganimda biroz xafa bo‘ldim. Ammo bir narsani bilaman, sen kabi chempion har doim yangi chaqiruvlarni topa oladi. Sening turmush tarzing va sportdagi yutuqlaring – dunyoda italiyalik sportchining eng yaxshi reklamasi bo‘ladi.

Franchesko Totti

Del Pyeroning buyuk chempion bo‘lishini tushunishim uchun u bilan 10 daqiqa suhbatlashish kifoya qilgandi. Aleks – italyan xalqiga mansub futbolchi. U Pele yoki Maradonadek bo‘lolmasligi mumkin, ammo aminmanki, Eysebio, Omar Sivori yoki Yoxan Kroyff darajasidagi o‘yinchiga aylanadi.

Jovanni Trapattoni

Bolaligimda del Pyero kumirim bo‘lgan. Men har doim “Yuventus”ga muxlis bo‘lganman va shunday bo‘lib qolaman, shu bois u men uchun tarixdagi eng buyuk futbolchilardan biridir. Maydonda ham, uning tashqarisida ham. Alessandroning o‘yinini to‘xtovsiz tomosha qilish mumkin. Del Pyero –futbolimizning haqiqiy xazinasi.

Marko Verratti

Del Pyero kabi o‘yinchilar 150 yilda bir marta tug‘iladi. Klubimizning har bir keyingi “o‘ninchi raqami” oldin kim bu raqamda o‘ynaganini bilishi va Aleks “Yuventus”da namoyish etgan darajaga mos kelishi kerak.

Janluiji Buffon

Men uchun del Pyero jamoamizning eng muhim o‘yinchisi hisoblanadi. U “Yuventus”ning haqiqiy ramzidir, men u bilan birga o‘ynash sharafidan juda faxrlanaman.

David Trezege

Avvalo, Ale mening kumirim bo‘lganini aytmoqchiman. Bolaligimda doimo u o‘ynagan jamoalar liboslarini sotib olardim. U “Yuventus”, Italiya va butun futbol olamiga juda ko‘p narsa bergan professional namunasidir. Va u Maldini yoki Ronaldodan aslo qolishmaydi.

Aleshandre Pato

Del Pyero – bu buyuk sportchi, Italiya va Yevropa tarixidagi eng zo‘rlaridan biri. Uning o‘yinini ko‘rish men uchun har doim yoqimli bo‘lgan. Bizning u bilan futbol yo‘llarimiz juda o‘xshash.

Raul

Del Pyero – “Yuventus” va Italiya tarixidagi eng yaxshi futbolchilardan biri. U o‘z o‘yinining go‘zalligi va pokligi tufayli millionlab futbol muxlislari orasida shuhrat qozongan.

Lionel Messi