Angliya Premyer Ligasi – dunyoning eng kuchli futbol chempionati sifatida qabul qilingan. Tabiiyki, u yerda dunyoning eng yaxshi futbolchilari jamlangan, kuchli raqobatda yutib chiqish esa hammaga ham nasib etavermaydi. Shuning uchun Angliyadagi futbolchilar sport formasini ushlab turish uchun qo‘lidan kelgan barcha ishni qiladi. Boisi bir martaga murabbiyning ishonchi yo‘qotilsa, uni qayta tiklash deyarli imkonsizdir. Afsuski, bunday holatga tushib qolganlarning soni kam emas. Demak, quyida aynan shu sabablar va kutilgan o‘yinni namoyish etolmagan, biroq boshqa chempionatga yo‘l olib, o‘z o‘rnini topgan taniqli futbolchilar haqida fikr yuritiladi.
Romelu Lukaku
Premyer Ligada 113 ta gol urib, liga tarixidagi yigirmanchi eng yaxshi to‘purarga aylangan Romelu Lukakuning iqtidoriga hech kim shubha qilmagan. Biroq “Everton”dan 75 million yevroga sotib olingan belgiyalik futbolchi “Manchester Yunayted”da kutilgan o‘yinni namoyish etdi deyish qiyin. U 96 ta o‘yinda 42 ta gol urdi, ammo na muxlislar va na murabbiylar shtabi uni o‘zlariniki deb qabul qildi.
“Angliyada o‘ynaganimda, meni tanbal deb atashardi, meni kam yugurishda va hech narsa qilmaslikda ayblashardi, – degandi Lukaku 2020-yili bergan intervyusida. – Hozir men va erishayotgan yutuqlarimga qarang. Angliyada ham shunday qila olgan bo‘lardim”.
Bu gaplari bilan u “Inter”ga o‘tgani haqida gapirgan. Darhaqiqat, Antonio Konte boshchiligida Lukaku allaqachon gollari sonini 50 tadan oshirib oldi. Uning yordamisiz, italyan klubi Yevropa Ligasi finaliga chiqa olmagan bo‘lardi. Uning o‘zi esa musobaqada yilning eng yaxshi futbolchisi deb topildi. Bundan tashqari “Inter” aynan uning yordami bilan 2010-yildan beri ilk marta Skudetto uchun jiddiy kurash olib borishni boshladi.
Kris Smolling
Harri Maguayr bilan shartnoma imzolangandan so‘ng “Yunayted” faxriysi Kris Smolling jamoada o‘z o‘rnini yo‘qotib bo‘lgandi. Viktor Lindelyof va Erik Bayi kabi o‘yinchilarning soyasida qolib ketishdan charchagan ingliz istalgan joyga, hatto notanish ligaga ham ketishga tayyor edi.
“Roma” uning yangi uyiga aylanishini hech kim taxmin ham qila olmas edi, ammo yakunda shunday bo‘lib chiqdi – dastlab ijara asosida o‘ynagan himoyachi Italiya poytaxtida doimiy ro‘yxatdan o‘tish uchun qo‘lidan kelgan barcha ishni qildi. Shu tariqa Smolling bugunga kunga qadar 50 ta uchrashuvda qatnashishga ulgurdi. 31 yoshida ko‘pchilik uning faoliyatida sho‘ng‘ish kuzatilishini aytgandi, ammo u rimliklarning yoqimtoyiga aylanib, ishonchli o‘yinlar ko‘rsata boshladi. “Manchester Yunayted”da esa bu hech qachon sodir bo‘lmagan. Smolling nari borsa jamoadagi tajribali o‘yinchilardan biri sifatida qabul qilinardi.
“Manchester Yunayted”da qolish eng oson yo‘l bo‘lardi, ammo men “Roma”ga nimadir o‘rganish uchun kelganman”, – degandi Smoling The Telegraph nashriga bergan intervyusida.
Serj Gnabri
16 yoshida “Arsenal”ga qo‘shilgan va keyinchalik “Vest Bromvich” tarkibiga ham kira olmagan futbolchining Yevropaning eng kuchli klubidagi asosiy figuraga aylanishiga ishonish qiyin edi. Ammo vaqtida inglizlar tomonidan qadrlanmagan Gnabri bugungi kunda “Bavariya” bilan Bundesliga, Chempionlar Ligasi va klublar o‘rtasidagi Jahon chempionatida g‘olib chiqishga ulgurdi.
Gnabri Angliyadagi faoliyati unga hech narsa bermasligini anglab, vatani Germaniyaga qaytib ketadi va u yerda avval “Verder”, keyin “Hoffenhaym”da o‘ynaydi. U yerdagi o‘yinlar esa unga “Bavariya” tarkibiga qo‘shilishga imkon berdi.
O‘tgan mavsum Chempionlar Ligasi bahslarida to‘qqizta o‘yinda to‘qqizta gol muallifiga aylangan futbolchi hozirda haqli ravishda Frank Riberining o‘rni va raqamiga egalik qilmoqda.
Genrix Mxitaryan
Premyer Liga tarixidagi yagona armanistonlik futbolchi Genrix Mxitaryan mahalliy muxlislar yodida deyarli hech narsasi bilan qolmagan. Hech kim u yerda uni jiddiy qabul qilmasdi ham. Uning “Manchester”dagi asosiy vazifasi Aleksis Sanchesning transferiga qo‘shilishi bo‘lgan.
Shubhasiz, Mxitaryan haqiqatan ham Angliyada noshud rolini o‘ynashni xohlamagan va ko‘plab omadi chopmaganlar qochadigan joy – Italiya, aniqrog‘i, “Roma”ga yo‘l oladi.
“Men futbol o‘ynashni yaxshi ko‘raman, zaxira o‘rindig‘ida vaqtni behuda sarflamoqchi emasman. Menga ishonishgani uchun “Roma”ga o‘tdim”, – degandi Mxitaryan “Roma”ga o‘tgani haqida.
Rimda Geynrix o‘z o‘rnini topa oldi va 38 uchrashuvda 17 ta gol urdi. Bu to‘rt yil ichida Angliyadagi gollaridan ko‘proq edi. 2020/21-yilgi mavsumda ham u liga assistentlar ro‘yxatida peshqadamlik qilmoqda.
Jerom Boateng
Jerom Boateng APLda shunchalik kam o‘ynaganki, ko‘pchilik hatto uning u yerda bo‘lganligini ham eslolmaydi.
“Manchester Siti” tarkibidagi atigi 16 o‘yindan so‘ng Boateng Vensan Kompani va Joleon Leskott bilan kurashishga qodirligini isbotlay olmaydi va ketishga qaror qiladi. Ammo qandaydir o‘rtamiyona jamoaga emas, balki “Bavariya”ga.
Myunxenliklar safida esa Boateng klub afsonasiga aylanadi va 214 ta uchrashuv o‘tkazdi. Klub darajasida Boateng 20 ta sovrinni qo‘lga kiritdi. Ular qatoriga sakkizta chempionat va ikkita Chempionlar Ligasi bosh sovrinlari ham kiradi.
“Ingliz matbuoti yangi mamlakatga ko‘nikishimga umuman imkon bermadi. Bu yerda ular darhol o‘ynab ketishingizni talab qiladi. Bu esa oson emas”, – degandi Boateng 2016-yilda Angliyadagi faoliyati haqida.
Memfis Depay
“Manchester Yunayted” muxlislari Memfis Depayning transferini muvaffaqiyatli deb tan olishni istamaganliklarini tushunish mumkin. Boisi u sarflangan 25 million funt sterlingni oqlolmagandi. Niderlandiyalik futbolchi Manchester klubi safida 33 uchrashuv o‘tkazib, atigi 2 ta gol uradi. Shu tariqa u jamoada o‘z o‘rniga bo‘la olmaydi va unga chiqish eshiklari ko‘rsatiladi.
Biroq 2016-yildan beri u “Lion” sharafini himoya qilmoqda, u yerda esa uni keragidan ortiq darajada qadrlashadi, albatta, haqli ravishda. U Fransiya chempionatida 121 o‘yinda 54 ta gol urdi. Agar jarohat bo‘lmaganida Memfis o‘tgan yilgi Chempionlar Ligasi yarim final o‘yinida (“Bavariya”ga qarshi) qatnashgan bo‘lar edi. Kim bilsin, balki u bo‘lganida o‘yin fransuz jamoasining foydasiga hal bo‘lgan bo‘larmidi.
O‘z intervyularida Depay o‘zi xohlagan maqomda bo‘lish imkoniyatini bergani uchun “Lion”ga minnatdorchilik bildiradi.
Bir paytlar “Yunayted” qadrlamagan niderlandiyalik futbolchi hozirda “Barselona”ning asosiy transfer maqsadi bo‘lib turibdi.
Boshqa intervyu va maqolalar:
- Bosniyalikdan daniyalikkacha. “Barselona” tarixidagi to‘qqizinchi raqamlar
- Alvido, qirol! 2020-yilda hayotdan ko‘z yumgan futbol yulduzlari
- Terma jamoa, legioner sifatidagi faoliyat, O‘zbekistonning mundialga chiqish imkoniyatlari haqida Osiyoning ikki karra eng yaxshi o‘yinchisi Server Jeparov bilan intervyu
Izoh (0)