Buxoroda probatsiyada turgan shaxsdan marixuana keltirib berishini talab qilgan, aks holda uni jinoiy javobgarlikka tortish bilan qo‘rqitgan Kogon IIB Jinoyat qidiruv bo‘limi boshlig‘i qo‘lga olindi, deb xabar bermoqda “Daryo” muxbiri. U DXX Qashqadaryo viloyati boshqarmasi Tergov hibsxonasiga joylashtirildi.
Ma’lum bo‘lishicha, bir necha marta giyohvandlik vositalarini sotish bilan jinoiy javobgarlikka tortilgan va ayni paytda probatsiya hisobida turgan, 1980-yilda Buxoro shahrida tug‘ilgan fuqaro S.Q. 2021-yilning 8-fevralida DXX Buxoro viloyati boshqarmasi boshlig‘i nomiga ariza bilan murojaat qilgan.
U o‘z arizasida 2020-yilning dekabr oyida Kogon shahar IIB JQB boshlig‘i, mayor R.K. uni o‘z xizmat xonasiga chaqirtirib, tadbir o‘tkazish maqsadida, undan Samarqand viloyati hududidan marixuana giyohvandlik vositasini keltirib berishini talab qilganini, keltirmagan taqdirda uni jinoiy javobgarlikka tortish bilan qo‘rqitganini ma’lum qilgan.
Oradan vaqt o‘tib, 2021-yil 8-fevral kuni R.K. fuqaro S.Q.ga yana qo‘ng‘iroq qilib, Samarqand viloyatidan 50 dona gugurt qutisida marixuana olib kelishni tayinlagan. Ariza muallifi hozirda probatsiya hisobida turgani uchun qayta qamoqqa olinishidan qo‘rqib, huquq-tartibot idoralariga murojaat qilib, unga nisbatan qonuniy chora ko‘rishni so‘ragan.
Arizada ko‘rsatilgan holatlarni tekshirib ko‘rish maqsadida 11-fevral kuni DXX Buxoro viloyati boshqarmasi xodimlari tomonidan tezkor tadbir o‘tkazilgan. Shu kuni soat 14:50 da mayor R.K. Kogon shahridagi Xiva ko‘chasida joylashgan “Bunyodkor” MFY binosi ro‘parasidagi yo‘l yoqasida o‘z boshqaruvidagi Lacetti’da kelgan. Avtomashinasi salonida fuqaro S.Q.dan kelgusida tadbir o‘tkazish maqsadini ko‘zlab, 300 gramm miqdoridagi marixuana giyohvandlik vositasining mulyajini qonunga xilof ravishda olgan vaqtida jinoyat ustida qo‘lga olingan.
Mayor R.K.ning xatti-harakatlariga nisbatan Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish), 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab, qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) 2-qismi bilan jinoyat ishi qo‘zg‘atilib, dastlabki tergov-surishtiruv harakatlari olib borilmoqda.
Ma’lumotga ko‘ra, 2021-yil 12-fevral kuni Jinoyat ishlari bo‘yicha Buxoro shahar sudining ajrimi bilan gumon qilinuvchi R.K.ga nisbatan qamoqqa olish ehtiyot chorasi qo‘llanilgan. R.K. saqlab turish uchun DXX Qashqadaryo viloyati boshqarmasi Tergov hibsxonasiga joylashtirilgan.
Eslatib o‘tamiz, Prezident Shavkat Mirziyoyev 27-yanvar kuni Buxoro viloyati Kogon shahar to‘rtta sektor (hokim, prokuror, IIB va DSI boshliqlari) rahbarlarini ishdan olgan, ularning bir yillik ish haqini kassaga to‘latish bo‘yicha topshiriq bergandi.
Izoh (0)