Ijtimoiy tarmoqlarda koronavirusga chalinish holatlari yana ko‘paya boshlagani, xususan, “britancha” shtamm tobora keng tarqalayotgani uchun qator shifoxonalar qayta ochilgani, Zangiotadagi yuqumli kasalliklarga qarshi kurashish kompleksi bemorlarga to‘lib ketgani haqida xabarlar tarqaldi.
Sog‘liqni saqlash vazirligi matbuot xizmati rahbari Furqat Sanayev xabarlar asossiz ekanligi, maxsus shifoxonalar yopilishda davom etayotganini “Kun.uz”ga ma’lum qildi.
“Negadir so‘nggi paytlarda mana shunday mazmundagi xabarlar ko‘payib qoldi. Qizig‘i, biz koronavirusga qarshi maxsus ochilgan yoki moslashtirilgan 159 ta markazdan faqat 12 tasi qolgani, Samarqand va Navoiy kabi viloyatlarda bunday komplekslar to‘liq yopilgani haqida e’lon qilayotgan paytimizda haqiqatga zid xabarlar tarqatilyapti.
Respublikamizdagi pandemiya bilan bog‘liq vaziyat barqaror, kasallikka chalinish holatlari kun sayin kamayib bormoqda, shifoxonalar yopilmoqda yoki konservatsiya qilinmoqda.
Xususan, Zangiotadagi 2-sonli yuqumli kasalliklar shifoxonasining ‘A’ blogi to‘lig‘icha konservatsiya qilindi (ya’ni zarur holatda tezkor ishlashga shay holatda yopildi). Umumiy hisobda 700 nafarga yaqin kishi davolanayotgan bu kompleksdagi aksariyat bemorlarda PZR testlar natijasida koronavirus infeksiyasi tasdiqlanmagan. Ko‘pchilik koronavirusga shubha bilan borib, boshqa mavsumiy kasalliklardan davolanyapti.
Demak, bunday asossiz xabarlarga ishonmaslik va noto‘g‘ri ma’lumot tarqatish uchun javobgarlik borligini yana bir bor eslatib o‘tishga zarurat paydo bo‘libdi”, — degan Furqat Sanayev.
Ma’lumot uchun, 2020-yilning 9-dekabrida Toshkent shahridagi “O‘zekspomarkaz”da tashkil etilgan saralash va taqsimlash markazlari hamda “Universal” sport majmuasidagi saralash va taqsimlash markazi, 2021-yilning 6-fevral kuni esa Samarqandda COVID-19 infeksiyasiga chalinganlarni davolashga mo‘ljallangan oxirgi markaz yopilgani haqida xabar berilgandi.
Sog‘liqni saqlash vazirligining so‘nggi ma’lumotlariga ko‘ra, pandemiya boshidan buyon O‘zbekistonda koronavirus infeksiyasi qayd etilganlar soni 79 442 nafarni tashkil etmoqda. Ayni vaqtda tibbiyot muassasalarida 892 kishi davolanmoqda, ulardan 153 nafari og‘ir, 28 nafari esa o‘ta og‘ir ahvolda.
Izoh (0)