Бухорода пробацияда турган шахсдан марихуана келтириб беришини талаб қилган, акс ҳолда уни жиноий жавобгарликка тортиш билан қўрқитган Когон ИИБ Жиноят қидирув бўлими бошлиғи қўлга олинди, деб хабар бермоқда «Дарё» мухбири. У ДХХ Қашқадарё вилояти бошқармаси Тергов ҳибсхонасига жойлаштирилди.
Маълум бўлишича, бир неча марта гиёҳвандлик воситаларини сотиш билан жиноий жавобгарликка тортилган ва айни пайтда пробация ҳисобида турган, 1980 йилда Бухоро шаҳрида туғилган фуқаро С.Қ. 2021 йилнинг 8 февралида ДХХ Бухоро вилояти бошқармаси бошлиғи номига ариза билан мурожаат қилган.
У ўз аризасида 2020 йилнинг декабрь ойида Когон шаҳар ИИБ ЖҚБ бошлиғи, майор Р.К. уни ўз хизмат хонасига чақиртириб, тадбир ўтказиш мақсадида, ундан Самарқанд вилояти ҳудудидан марихуана гиёҳвандлик воситасини келтириб беришини талаб қилганини, келтирмаган тақдирда уни жиноий жавобгарликка тортиш билан қўрқитганини маълум қилган.
Орадан вақт ўтиб, 2021 йил 8 февраль куни Р.К. фуқаро С.Қ.га яна қўнғироқ қилиб, Самарқанд вилоятидан 50 дона гугурт қутисида марихуана олиб келишни тайинлаган. Ариза муаллифи ҳозирда пробация ҳисобида тургани учун қайта қамоққа олинишидан қўрқиб, ҳуқуқ-тартибот идораларига мурожаат қилиб, унга нисбатан қонуний чора кўришни сўраган.
Аризада кўрсатилган ҳолатларни текшириб кўриш мақсадида 11 февраль куни ДХХ Бухоро вилояти бошқармаси ходимлари томонидан тезкор тадбир ўтказилган. Шу куни соат 14:50 да майор Р.К. Когон шаҳридаги Хива кўчасида жойлашган «Бунёдкор» МФЙ биноси рўпарасидаги йўл ёқасида ўз бошқарувидаги Lacetti’да келган. Автомашинаси салонида фуқаро С.Қ.дан келгусида тадбир ўтказиш мақсадини кўзлаб, 300 грамм миқдоридаги марихуана гиёҳвандлик воситасининг муляжини қонунга хилоф равишда олган вақтида жиноят устида қўлга олинган.
Майор Р.К.нинг хатти-ҳаракатларига нисбатан Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш), 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб, қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) 2-қисми билан жиноят иши қўзғатилиб, дастлабки тергов-суриштирув ҳаракатлари олиб борилмоқда.
Маълумотга кўра, 2021 йил 12 февраль куни Жиноят ишлари бўйича Бухоро шаҳар судининг ажрими билан гумон қилинувчи Р.К.га нисбатан қамоққа олиш эҳтиёт чораси қўлланилган. Р.К. сақлаб туриш учун ДХХ Қашқадарё вилояти бошқармаси Тергов ҳибсхонасига жойлаштирилган.
Эслатиб ўтамиз, Президент Шавкат Мирзиёев 27 январь куни Бухоро вилояти Когон шаҳар тўртта сектор (ҳоким, прокурор, ИИБ ва ДСИ бошлиқлари) раҳбарларини ишдан олган, уларнинг бир йиллик иш ҳақини кассага тўлатиш бўйича топшириқ берганди.
Изоҳ (0)