Qarshi tumanida 71 ta mevali daraxt o‘zboshimchalik bilan qo‘porib tashlanishi oqibatida tabiatga salkam 28 mln so‘m zarar yetkazildi

Qashqadaryo viloyatining Qarshi tumanida 71 dona mevali daraxt tag-tugi bilan qo‘porib tashlanib, tabiatga 27 million 551 ming so‘m zarar yetkazildi.

Bu haqda “Daryo”ga ma’lum qilgan fermer Sunnat Toshmatovning aytishicha, o‘zboshimchalik Akmal Botirov ismli tadbirkor tomonidan “hokim buyurdi”, degan vaj bilan amalga oshirilgan.

“Ne-ne umidlar bilan parvarishlagan bog‘im va 71 ta mevali daraxtim traktor yordamida tag-tugi bilan qo‘porib tashlanibdi. Bu ishni qilgan Akmal Botirovdan nimaga bunday qilganini so‘raganimda ‘Bu yerni bizga hokim opa berdi va daraxtlarni qo‘porib tashlayverishimni aytdi’, dedi”, — deydi “Dilmurodov Obid” fermer xo‘jaligi rahbari Sunnat Toshmatov.

Fermer Sunnat Toshmatovning aytishicha, bog‘idagi mevali daraxtlar kesib tashlanganini bilgach viloyat Ekologiya va atrof muhitni muhofaza qilish boshqarmasiga murojaat qilgan.

“Ekologiyadan odamlar kelib, vaziyatni o‘z ko‘zi bilan ko‘rishdi. Akmal bilan gaplashishdi. Akmal ularga ham bu ishni hokim buyurganini bildirdi. Lekin men hokimning oldiga borib, bunga izoh so‘raganimda hokim bu ishni buyurmaganini aytdi”, — deydi bog‘idagi mevali daraxtlari kesib tashlangan fermer.

Fermerning aytishicha, uning bog‘i 1,7 gektarni tashkil qiladi.

“Haqiqatan ham Qarshi tumanidagi Yangibog‘ hududidagi 1,7 gektar maydonga ega bog‘dan 71 ta mevali daraxt tag-tugi bilan texnika yordamida qo‘porib tashlangani, natijada tabiatga yetkazilgan zarar 27 million 551 ming 500 so‘mni tashkil qilgani ma’lum bo‘ldi. Bu haqda boshqarmamiz tomonidan viloyat prokuroriga murojaat qilingan. Fuqaro Akmal Botirovning xatti-harakatiga huquqiy baho berish va javobgarlik masalasini hal etish so‘ralgan”, — deydi viloyat Ekologiya va atrof muhitni muhofaza qilish boshqarmasi axborot xizmati rahbari Karima Yodgorova.

“Daryo” muxbiri bilan suhbatlashgan tadbirkor Akmal Botirovning aytishicha, daraxtlar kesib tashlangan bog‘ eski bog‘ bo‘lib, bog‘ joylashgan yer-maydoni tuman hokimi tomonidan unga hujjatlashtirib berilgan.

“O‘sha yerda zavod qurishni mo‘ljal qilganmiz. 22 million dollar investitsiya olib kirib, 250 ta yangi ish o‘rni yaratyapmiz. Bu Prezidentimizning viloyatga tashrifi chog‘ida aytilgan. Qolaversa, fermer bu yerni noqonuniy egallab olgan ekan. Daraxtlar ham meva bermaydigan daraxtlar ekan”, — dedi Akmal Botirov.

Akmal Botirov bog‘ joylashgan hudud hokimlik tomonidan unga berilgani uchun daraxtlarni kesishga jur’at qilganini, ammo fermer aytganidek 71 ta emas, 2-3 ta daraxt kesilganini, keyin daraxt kesish ishlari to‘xtatilganini bildirdi.

Akmal Botirovning aytishicha, u o‘ziga berilgan yer-maydonidagi daraxtlarni kesish uchun hech qaysi tashkilotdan ruxsat olmagan. Viloyat ekologiya va atrof muhitni muhofaza qilish boshqarmasi viloyat prokuraturasiga murojaat qilib, daraxt kesgani uchun undan 27 million 500 ming so‘m jarima undirishni so‘rganidan ham xabari yo‘qligini aytdi.

Eslatib o‘tamiz, O‘zbekistonda daraxtlarni kesishga joriy etilgan moratoriy 2021-yil oxirgacha uzaytirilgandi.