DXX Andijon viloyat boshqarmasi va Bosh prokuratura huzuridagi departamentning hududiy boshqarmasi xodimlari hamkorligida o‘tkazilgan tezkor tadbirda viloyatdagi bolalar musiqa va san’at maktablaridan birining direktori 500 dollar pora olayotganida qo‘lga olindi. Bu haqda “Daryo” muxbiri Umidjon Mamarasulov xabar berdi.
Ta’kidlanishicha, bolalar musiqa va san’at maktabi direktori V.S. fuqaro R.D.dan uning farzandi A.A. nomiga o‘zi rahbarlik qilayotgan maktabda o‘qiganligi to‘g‘risida guvohnoma tayyorlab berish evaziga 200 dollar hamda viloyatdagi san’at kollejida yuqori lavozimda ishlovchi tanishlari orqali A.A.ni kollejga o‘qishga kiritib qo‘yishi evaziga 300 dollar talab qilgan.
O‘tkazilgan tezkor tadbir davomida V.S. 500 dollarni xizmat xonasida olayotgan vaqtida ashyoviy dalillar bilan ushlangan.
Hozirda mazkur holat yuzasidan Jinoyat kodeksining 28-moddasi (jinoyat ishtirokchilarining turlari), 211-moddasi (pora berish) va 168-moddasi (firibgarlik), 210-modda (pora olish) bilan jinoyat ishi qo‘zg‘atilgan bo‘lib, tergov-surishtiruv harakatlari amalga oshirilmoqda.
Izoh (0)