Қарши туманида 71 та мевали дарахт ўзбошимчалик билан қўпориб ташланиши оқибатида табиатга салкам 28 млн сўм зарар етказилди

Қашқадарё вилоятининг Қарши туманида 71 дона мевали дарахт таг-туги билан қўпориб ташланиб, табиатга 27 миллион 551 минг сўм зарар етказилди.

Бу ҳақда «Дарё»га маълум қилган фермер Суннат Тошматовнинг айтишича, ўзбошимчалик Акмал Ботиров исмли тадбиркор томонидан «ҳоким буюрди», деган важ билан амалга оширилган.

«Не-не умидлар билан парваришлаган боғим ва 71 та мевали дарахтим трактор ёрдамида таг-туги билан қўпориб ташланибди. Бу ишни қилган Акмал Ботировдан нимага бундай қилганини сўраганимда ‘Бу ерни бизга ҳоким опа берди ва дарахтларни қўпориб ташлайверишимни айтди’, деди», — дейди «Дилмуродов Обид» фермер хўжалиги раҳбари Суннат Тошматов.

Фермер Суннат Тошматовнинг айтишича, боғидаги мевали дарахтлар кесиб ташланганини билгач вилоят Экология ва атроф муҳитни муҳофаза қилиш бошқармасига мурожаат қилган.

«Экологиядан одамлар келиб, вазиятни ўз кўзи билан кўришди. Акмал билан гаплашишди. Акмал уларга ҳам бу ишни ҳоким буюрганини билдирди. Лекин мен ҳокимнинг олдига бориб, бунга изоҳ сўраганимда ҳоким бу ишни буюрмаганини айтди», — дейди боғидаги мевали дарахтлари кесиб ташланган фермер.

Фермернинг айтишича, унинг боғи 1,7 гектарни ташкил қилади.

«Ҳақиқатан ҳам Қарши туманидаги Янгибоғ ҳудудидаги 1,7 гектар майдонга эга боғдан 71 та мевали дарахт таг-туги билан техника ёрдамида қўпориб ташлангани, натижада табиатга етказилган зарар 27 миллион 551 минг 500 сўмни ташкил қилгани маълум бўлди. Бу ҳақда бошқармамиз томонидан вилоят прокурорига мурожаат қилинган. Фуқаро Акмал Ботировнинг хатти-ҳаракатига ҳуқуқий баҳо бериш ва жавобгарлик масаласини ҳал этиш сўралган», — дейди вилоят Экология ва атроф муҳитни муҳофаза қилиш бошқармаси ахборот хизмати раҳбари Карима Ёдгорова.

«Дарё» мухбири билан суҳбатлашган тадбиркор Акмал Ботировнинг айтишича, дарахтлар кесиб ташланган боғ эски боғ бўлиб, боғ жойлашган ер майдони туман ҳокими томонидан унга ҳужжатлаштириб берилган.

«Ўша ерда завод қуришни мўлжал қилганмиз. 22 миллион доллар инвестиция олиб кириб, 250 та янги иш ўрни яратяпмиз. Бу Президентимизнинг вилоятга ташрифи чоғида айтилган. Қолаверса, фермер бу ерни ноқонуний эгаллаб олган экан. Дарахтлар ҳам мева бермайдиган дарахтлар экан», — деди Акмал Ботиров.

Акмал Ботиров боғ жойлашган ҳудуд ҳокимлик томонидан унга берилгани учун дарахтларни кесишга журъат қилганини, аммо фермер айтганидек 71 та эмас, 2-3 та дарахт кесилганини, кейин дарахт кесиш ишлари тўхтатилганини билдирди.

Акмал Ботировнинг айтишича, у ўзига берилган ер майдонидаги дарахтларни кесиш учун ҳеч қайси ташкилотдан рухсат олмаган. Вилоят экология ва атроф муҳитни муҳофаза қилиш бошқармаси вилоят прокуратурасига мурожаат қилиб, дарахт кесгани учун ундан 27 миллион 500 минг сўм жарима ундиришни сўрганидан ҳам хабари йўқлигини айтди.

Эслатиб ўтамиз, Ўзбекистонда дарахтларни кесишга жорий этилган мораторий 2021 йил охиргача узайтирилганди.