Chegaralar yopilgani va koronavirusga chalingani tufayli vataniga qayta olmagani uchun “butun Rossiyani portlatib yuborish” bilan tahdid qilgan O‘zbekiston fuqarosi qo‘lga olindi. Bu haqda “Fontanka.ru” xabar berdi.
Ma’lum qilinishicha, 10-fevral kuni Otabek ismli 41 yoshli erkak favqulodda xizmat raqamiga qo‘ng‘iroq qilib, koronavirusga chalingani va vataniga qayta olmayotganini aytgan. Shu sababli butun Rossiyani portlatish bilan tahdid qilgan. “Nevskiye Novosti”ning yozishicha, uning vaqtinchalik ro‘yxatda turish muddati fevral oxirlarida yakunlanishi vaziyatni yanada chigallashtirgan.
Politsiya qo‘ng‘iroq qilgan shaxs Leningrad viloyatining Vsevolojsk tumanida ro‘yxatga olingani aniqlagan, ammo ko‘rsatilgan manzildan uni topa olishmagan.
Migrantning tahdidli qo‘ng‘irog‘idan ikki soat o‘tib u Sankt-Peterburgda qo‘lga olingan va unga qarshi mayda bezorilik bo‘yicha ma’muriy bayonnoma rasmiylashtirilgan.
Ayni paytda unga qarshi jinoyat ishi qo‘zg‘atish masalasi ko‘rib chiqilmoqda.
Izoh (0)