Gulistonda 1,5 ming dollar evaziga Milliy gvardiya tizimiga ishga kiritib qo‘yishni va’da qilgan shaxs ushlandi

Sirdaryo viloyatining Guliston shahrida Milliy gvardiya tizimiga ishga kiritib qo‘yish evaziga 1,5 ming dollar talab qilgan shaxs ushlandi.

Ma’lum bo‘lishicha, S.E. yuqori lavozimda ishlovchi tanishlari orqali U.J.ni Milliy gvardiya tizimiga kiritib qo‘yishni va’da qilgan. Buning evaziga 1500 dollar talab qilib, shundan 500 dollarni Guliston shahrining “Yangi bozor” hududidagi avtoturargohda olayotgan vaqtida huquqni muhofaza qiluvchi idoralar xodimlari tomonidan ashyoviy dalillar bilan qo‘lga olingan.

S.E.ga nisbatan Jinoyat kodeksining 168-moddasi (firibgarlik) 1-qismi va 28-, 211-moddasi (pora berish) 1-qismi bilan jinoyat ishi qo‘zg‘atilgan. Ayni paytda tergov harakatlari olib borilmoqda.

Avvalroq Milliy gvardiya tizimiga ishga kiritib qo‘yish uchun Qarshida 4,5 ming dollar, Samarqandda 27 ming dollar olgan shaxslar ushlangani haqida xabar berilgan edi.