Toshkentda 12 foizli avtokredit berishga ishontirgan korxona rahbari mijozlarning 713,8 million so‘mini o‘zlashtirgani aniqlandi. Bu haqda “Daryo”ga Bosh prokuratura matbuot xizmati xabar berdi.
Departamentning Mirzo Ulug‘bek tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda “E.A.” xususiy korxonasi rahbari D.T. faoliyati davomida noqonuniy daromad orttirishni ko‘zlab, fuqarolarni yillik ustama to‘lovi 12 foizni tashkil etuvchi avtokredit berishga qiziqtirib kelganligi aniqlangan.
Korxona rahbari 119 nafar fuqaroni yuqoridagi shart bilan avtokredit berishga ishontirib, ular bilan 4 oy mobaynida tuzilgan shartnomalarga asosan avtomashina narxining 6 foiz miqdorida oldindan to‘lov shaklida korxona hisob-raqamiga o‘tkazilgan 713,8 million so‘mni o‘zining shaxsiy ehtiyojlariga ishlatib yuborgan.
Holat yuzasidan korxona rahbariga nisbatan Jinoyat kodeksining 168-moddasi (firibgarlik) 4-qismi bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda avtomashinani foizsiz sotish sharti bilan 150 nafardan ortiq kishini aldab pullarini o‘zlashtirgan firma faoliyati fosh qilingani, foizlarsiz 40 oyda avtomobil olib berishni va’da qilgan firibgar firma mansabdorlari qamoqqa olingani haqida xabar berilgan edi.
Shuningdek, qisqa vaqt ichida 19,3 ming nafar fuqarolarning jami 54,3 milliard so‘m miqdordagi pullarini firibgarlik yo‘li bilan qo‘lga kiritganlikda ayblanib, 6 oydan buyon sud ishi ko‘rilayotgan “Avto 60 oy” MChJ mansabdorlari bo‘yniga qo‘yilgan 54 milliard so‘mning 70 foizi turganini, imkon berilsa, hamma pulni qaytarishini aytgani haqida xabar berilgandi.
Izoh (0)