Tashqi mehnat migratsiyasi agentligi O‘zbekiston fuqarolariga ogohlantirish bilan chiqib, Rossiyaga olib kirib qo‘yish xizmatlarini taklif etayotgan shaxslarga ishonmaslikka chaqirdi.
Agentlikning ma’lum qilishicha, ijtimoiy tarmoqlarda O‘zbekiston fuqarolarining vaqtincha mehnat faoliyati bilan shug‘ullanish maqsadida Rossiya hududiga kirishi uchun ruxsatnoma olib berish bo‘yicha xizmatlar taklif etilmoqda.
Chet el fuqarolarining Rossiyaga kirishi bo‘yicha Rossiya hukumatining 2020-yil 16-martdagi “Rossiya Federatsiyasiga chet el fuqarolari va fuqaroligi bo‘lmagan shaxslarning kirishini vaqtincha cheklash va vizalar va taklifnomalarni berishni vaqtincha to‘xtatib turish to‘g‘risida”gi farmoyishi bilan qator cheklovlar joriy etilgan.
Ushbu farmoyish bugungi kunga qadar amalda va O‘zbekiston fuqarolarining individual tarzda vaqtincha mehnat faoliyati bilan shug‘ullanish maqsadida Rossiyaga kirishiga ruxsat yo‘q. Faqatgina Rossiya hukumatining koronavirusga qarshi shtabi tomonidan chegara xizmatlariga taqdim etilayotgan ro‘yxat asosida tashkiliy tarzda ishga yuborilayotgan shaxslar ushbu mamlakatga kiritilmoqda.
“Ijtimoiy tarmoqlarda paydo bo‘lgan chet el fuqarosining vaqtincha mehnat faoliyati bilan shug‘ullanishi uchun Rossiya hududiga kirish huquqini beruvchi ruxsatnomaning mazkur shakli viza talab etiladigan davlatlar fuqarolariga beriladi. MDH, shu jumladan, O‘zbekiston fuqarolari uchun esa ruxsatnomaning mazkur shakli tatbiq etilmaydi.
Shu o‘rinda yurtdoshlarimizdan Rossiya Federatsiyasi hududiga olib kirib qo‘yish xizmatlarini taklif etayotgan shaxslarga ishonmasliklarini va turli yo‘llar bilan ushbu mamlakatga noqonuniy kirib borishga urinmasliklarini tavsiya qilamiz”, — deyiladi agentlik xabarida.
Rossiyada ishlash maqsadida ushbu davlatga borish tartibi haqida ma’lumotlar olish uchun o‘zbekistonliklar Tashqi mehnat migratsiyasi agentligiga murojaat qilishlari mumkinligi aytilgan.
Agentlik avvalroq turli soxta hujjatlar bilan chegaralarni kesib o‘tishga urinish O‘zbekiston va Rossiya qonunlariga ko‘ra jinoiy javobgarlikka tortilishga sabab bo‘lishi mumkinligi haqida ogohlantirgandi.
Izoh (0)