Surxondaryo viloyatining Termiz shahrida jurnalistlar uchun uy quriladi. Bu haqda viloyat hokimi To‘ra Bobolov jurnalistlar bilan muloqotda ma’lum qildi, deya xabar berdi “Daryo” muxbiri.
To‘ra Bobolovning matbuot kotibi Zahiriddin To‘rayevning aniqlik kiritishicha, viloyat rahbari bu haqda OAV vakillari, tashkilot va korxona matbuot xizmati xodimlari bilan muloqot chog‘ida ma’lum qilgan.
“Viloyat rahbari To‘ra Bobolov bilan muloqotda Jurnalistlar ijodiy uyushmasi viloyat bo‘limi raisi Muhiddin Abdurahmonov ba’zi jurnalist va OAV xodimlari Termiz shahrida ijarada yashayotganini, ba’zilari hamon tumanlardan qatnab ishlayotganini aytib, uy masalasida ko‘mak so‘radi”, — dedi Zahiriddin To‘rayev.
Mazkur savolga javob bergan To‘ra Bobolov tez kunlarda Termiz shahrida kam ta’minlangan jurnalistlar, OAV xodimlari uchun alohida uy qurilishiga va’da bergan va ijodkorlar uchun qurilayotgan uyning boshlang‘ich to‘lovini hokimiyat to‘lab berishini qo‘shimcha qilgan.
Eslatib o‘tamiz, avvalroq viloyat hokimining ashaddiy tanqidchisi deya ta‘riflangan Otabek Sattoriy ismli bloger Surxondaryoda tovlamachilik yo‘li bilan dehqon bozori rahbaridan 5 mln so‘mlik telefon talab qilgan paytda qo‘lga olingani haqida xabar berilgandi. Keyinchalik bu haqda gapirgan deputat Rasul Kusherbayev holatni “Bu Prezidentning ochiqlik siyosatiga qarshi surxondaryolik amaldorlarning isyoni”, deb atadi. OAVga intervyu bergan bloger advokati ishni uyushtirilgan deb hisoblashini bildirdi. Kuni kecha bu haqda chiqish qilgan Ichki ishlar vazirligi axborot xizmati rahbari Shohruh G‘iyosov esa “Tergov va sud organlari o‘zining vakolat doirasidagi faoliyatini, jumladan, muhokama etilayotgan holat yuzasidan aybsizlik prezumpsiyasiga to‘la rioya etgan holda hamda jamoatchilik oldidagi majburiyatidan kelib chiqib olib boradilar”, deya ijtimoiy tarmoq faollarini qonunchilikni hurmat qilishga chaqirdi.
Izoh (0)