Сурхондарё вилоятининг Термиз шаҳрида журналистлар учун уй қурилади. Бу ҳақда вилоят ҳокими Тўра Боболов журналистлар билан мулоқотда маълум қилди, дея хабар берди «Дарё» мухбири.
Тўра Боболовнинг матбуот котиби Заҳириддин Тўраевнинг аниқлик киритишича, вилоят раҳбари бу ҳақда ОАВ вакиллари, ташкилот ва корхона матбуот хизмати ходимлари билан мулоқот чоғида маълум қилган.
«Вилоят раҳбари Тўра Боболов билан мулоқотда Журналистлар ижодий уюшмаси вилоят бўлими раиси Муҳиддин Абдураҳмонов баъзи журналист ва ОАВ ходимлари Термиз шаҳрида ижарада яшаётганини, баъзилари ҳамон туманлардан қатнаб ишлаётганини айтиб, уй масаласида кўмак сўради», — деди Заҳириддин Тўраев.
Мазкур саволга жавоб берган Тўра Боболов тез кунларда Термиз шаҳрида кам таъминланган журналистлар, ОАВ ходимлари учун алоҳида уй қурилишига ваъда берган ва ижодкорлар учун қурилаётган уйнинг бошланғич тўловини ҳокимият тўлаб беришини қўшимча қилган.
Эслатиб ўтамиз, аввалроқ вилоят ҳокимининг ашаддий танқидчиси дея таърифланган Отабек Сатторий исмли блогер Сурхондарёда товламачилик йўли билан деҳқон бозори раҳбаридан 5 млн сўмлик телефон талаб қилган пайтда қўлга олингани ҳақида хабар берилганди. Кейинчалик бу ҳақда гапирган депутат Расул Кушербаев ҳолатни «Бу Президентнинг очиқлик сиёсатига қарши сурхондарёлик амалдорларнинг исёни», деб атади. ОАВга интервью берган блогер адвокати ишни уюштирилган деб ҳисоблашини билдирди. Куни кеча бу ҳақда чиқиш қилган Ички ишлар вазирлиги ахборот хизмати раҳбари Шоҳруҳ Ғиёсов эса «Тергов ва суд органлари ўзининг ваколат доирасидаги фаолиятини, жумладан, муҳокама этилаётган ҳолат юзасидан айбсизлик презумпсиясига тўла риоя этган ҳолда ҳамда жамоатчилик олдидаги мажбуриятидан келиб чиқиб олиб борадилар», дея ижтимоий тармоқ фаолларини қонунчиликни ҳурмат қилишга чақирди.
Изоҳ (0)