Galaxy S7’dan boshlab Samsung kompaniyasining Galaxy S smartfonlari lineykasidagi barcha qurilmalar chang va namlikdan IP68 standarti bo‘yicha himoyalangan. Bu Samsung’ning yangi uchta flagmaniga ham taalluqli, deb xabar beradi Hi-Tech.Mail.ru.
YouTube’dagi blogerlardan biri yangi Samsung Galaxy S21 suv ostida qancha vaqt tura olishini sinab ko‘rishga qaror qildi. Qurilma suv to‘ldirilgan akvarium tubiga tushirilgan va sekundomeri yoniq holda qoldirilgan. Suv o‘tkazmaslik qobiliyatini tekshirishga mo‘ljallangan oddiy test haqiqiy ekstremal sinovga aylanadigan ko‘rinadi, chunki smartfon suvga tushirilganiga bir haftadan oshdi va hamon o‘sha yerda.
Tajribani to‘g‘ridan to‘g‘ri efir orqali kuzatish mumkin:
Ma’lum qilinishicha, sekundomerni sozlash uchun smartfon kamida ikki marotaba suv ostidan olingan. Aniqlanishicha, qurilmadagi taymer 99 soat 59 daqiqa-yu 59 soniyadan ortiq ishlamaydi. Smartfonni quvvatlantirishda u suvdan chiqarilmaydi — zarurat tug‘ilganida simsiz quvvatlantirgichdan foydalanilmoqda.
Smartfon namlik borligi to‘g‘risidagi birinchi ogohlantirishni suv ostida 117 soat-u 53 daqiqa qolganidan so‘ng bergan. Bu vaqtda ekran ishlamay qola boshlagan, qurilmaning o‘zidagi mobil dasturlar biridan boshqasida aylanib ketavergan. 241 soatdan keyin esa dinamiklar to‘liq ishlashdan to‘xtagan.
Test hali yakunlangani yo‘q. Aftidan, tajriba muallifi qurilmaning butunlay ishdan chiqishini kutmoqda. IP68 standarti bo‘yicha telefon 1,5 metr chuqurlikdagi suv ostida 30 daqiqaga bardosh bera olishi kerak. Testda foydalanilayotgan akvariumning chuqurligi yarim metrga ham yetmaydi.
Ma’lumot uchun, Samsung ham boshqa smartfon ishlab chiqaruvchilar kabi qurilmaga suv orqali yetkazilgan zararga kafolat bermaydi.
Izoh (0)