Galaxy S7’дан бошлаб Samsung компаниясининг Galaxy S смартфонлари линейкасидаги барча қурилмалар чанг ва намликдан IP68 стандарти бўйича ҳимояланган. Бу Samsung’нинг янги учта флагманига ҳам тааллуқли, деб хабар беради Hi-Tech.Mail.ru.
YouTube’даги блогерлардан бири янги Samsung Galaxy S21 сув остида қанча вақт тура олишини синаб кўришга қарор қилди. Қурилма сув тўлдирилган аквариум тубига туширилган ва секундомери ёниқ ҳолда қолдирилган. Сув ўтказмаслик қобилиятини текширишга мўлжалланган оддий тест ҳақиқий экстремал синовга айланадиган кўринади, чунки смартфон сувга туширилганига бир ҳафтадан ошди ва ҳамон ўша ерда.
Тажрибани тўғридан-тўғри эфир орқали кузатиш мумкин:
Маълум қилинишича, секундомерни созлаш учун смартфон камида икки маротаба сув остидан олинган. Аниқланишича, қурилмадаги таймер 99 соат 59 дақиқаю 59 сониядан ортиқ ишламайди. Смартфонни қувватлантиришда у сувдан чиқарилмайди — зарурат туғилганида симсиз қувватлантиргичдан фойдаланилмоқда.
Смартфон намлик борлиги тўғрисидаги биринчи огоҳлантиришни сув остида 117 соату 53 дақиқа қолганидан сўнг берган. Бу вақтда экран ишламай қола бошлаган, қурилманинг ўзидаги мобил дастурлар биридан бошқасида айланиб кетаверган. 241 соатдан кейин эса динамиклар тўлиқ ишлашдан тўхтаган.
Тест ҳали якунлангани йўқ. Афтидан, тажриба муаллифи қурилманинг бутунлай ишдан чиқишини кутмоқда. IP68 стандарти бўйича телефон 1,5 метр чуқурликдаги сув остида 30 дақиқага бардош бера олиши керак. Тестда фойдаланилаётган аквариумнинг чуқурлиги ярим метрга ҳам етмайди.
Маълумот учун, Samsung ҳам бошқа смартфон ишлаб чиқарувчилар каби қурилмага сув орқали етказилган зарарга кафолат бермайди.
Изоҳ (0)