Coca-Cola Uzbekistan’ning davlat ulushiga talabgorlar aniqlandi. Ular orasida Afrika kompaniyalari ham bor

Coca-Cola Uzbekistan kompaniyasidagi davlat ulushini sotish bo‘yicha jarayonning birinchi bosqichi yakunlandi, deya xabar bermoqda Davlat aktivlarini boshqarish agentligi.

Xabar berishlaricha, davlat ulushini sotib olish bo‘yicha takliflar Osiyo, Yevropa, Amerika va Afrika davlatlaridagi bir qator talabgorlardan kelib tushgan. Ular kompaniyaning ikkinchi mulkdori — Coca-Cola Group bilan kelishilgan holda ko‘rib chiqilgan.

“Sotish uchun belgilangan mezonlarga mos kelgan deb e’tirof etilgan talabgorlar keyingi bosqichga o‘tkazildi. Ushbu talabgorlar bilan muzokaralar jarayoni davlat ulushini sotish bo‘yicha jalb etilgan xalqaro maslahatchilar — Rothschild & Cie investitsiya banki (moliyaviy maslahatchi, Fransiya) va Dentons yuridik firmasi (yuridik maslahatchi, Buyuk Britaniya) ishtirokida davom ettiriladi”, — deyiladi agentlik axborotida.

Mazkur bosqichda talabgorlar bilan Oshkor etmaslik to‘g‘risidagi tegishli bitimlar (NDA) imzolanadi, ularga Coca-Cola Uzbekistan to‘g‘risidagi qo‘shimcha ma’lumotlar taqdim etiladi. Agentlik axborotida talabgor kompaniyalar nomi oshkor etilmagan, biroq avvalroq talabgorlar orasida Coca-Cola’ning Turkiyadagi shu’basi borligi ma’lum bo‘lgan edi.

Coca-Cola Uzbekistan (Coca-Cola Ichimligi Uzbekiston, Ltd) foyda keltiruvchi korxona hisoblanadi. Spot’ning yozishicha, kompaniya 2018-yilda jami 999,4 milliard so‘m, 2019-yilda esa 1,4 trillion so‘m daromad olgan. Sof foyda hajmi esa 2018-yilda 91,3 milliard so‘mni, 2019-yilda esa 207,1 milliard so‘mni tashkil etgan.

Kompaniyaning qarzdorligi 2019-yilda 52,4 milliard so‘mni tashkil etgan, boshqalar esa Coca-Cola Uzbekistan’ga 100,6 milliard so‘m qarz bo‘lgan. Korxona yiliga o‘rtacha 200 milliard so‘m atrofida soliq to‘laydi — 2018-yilda 213,1 milliard, 2019-yilda esa 184 milliard so‘m soliq to‘langan.