Qirg‘iziston bosh vaziri Ulug‘bek Maripov mamlakatning Cho‘y viloyati sobiq gubernatorini Bishkek meri vazifasini bajaruvchi etib tayinladi, deb yozadi Tengrinews.
Baktibek Kudaybergenov Qirg‘iziston poytaxti Bishkekning yangi meri saylanguniga qadar mer vazifasini bajarib turadi. Tegishli qaror bosh vazir tomonidan imzolangan.
Bosh vazir matbuot xizmati vakiliga ko‘ra, Maripovning yana bir qarori bilan tadbirkor Ermek Nurgaziyevning mer vazifasini bajaruvchi etib tayinlanishi bekor qilingan.
9-fevral kuni Bishkek meri vazifasini bajaruvchi Balbak Tulobayev uch oylik faoliyatidan keyin o‘z xohishiga binoan lavozimdan iste’foga chiqqan edi. Vazirlar Mahkamasi rahbari shu kuniyoq ayollarni kaltaklashi bilan nom chiqargan Nurgaziyevni lavozimga tayinladi. Biroq bu qaror avval jamoatchilik, so‘ng mamlakat prezidenti Sadir Japarov tomonidan tanqidga uchradi.
Avvalroq Bishkekning sobiq meri Albek Ibraimovga qarshi korrupsiyaga bog‘liq bo‘lgan holatlar bo‘yicha yana bir jinoiy ish qo‘zg‘atilgani xabar berilgan edi. Sobiq shahar hokimi qamoqdan 5-oktabrdan 6-oktabrga o‘tar kechasi yuz bergan tartibsizliklar fonida ozod qilingan. Ibraimov Jazoni ijro etish davlat xizmatining koloniyaga ixtiyoriy ravishda qaytish to‘g‘risidagi murojaatini inkor qildi va hozirda xalqaro qidiruvda.
Izoh (0)