Rossiyalik muxolifatchi Aleksey Navalniyning mintaqaviy shtablari tarmog‘i rahbari Leonid Volkov siyosatchining jamoasi yaqin dam olish kunlari mitinglar o‘tkazmasligini e’lon qildi. Bu haqda u 4-fevral, payshanba kuni “Navalniy Live” YouTube kanali efirida ma’lum qildi, deb yozadi “RBK”.

Foto: Getty Images

Uning so‘zlariga ko‘ra, hududlarda Navalniyning tarafdorlari va mahalliy muvofiqlashtiruvchilar 23 va 31-yanvardagi mitinglar tufayli hibsga olingani sababli u yerlarda aksiyalarni tashkillashtiradigan odamlar yo‘q. Ustiga-ustak, har hafta aksiya o‘tkazish norozilikning ko‘cha shakliga nisbatan hafsala pir bo‘lishiga olib kelishi mumkin.

“Agar biz har hafta norozilikka chiqadigan bo‘lsak, yana minglab odamlar hibsga olinadi, yuzlab odamlar do‘pposlanadi. Shtablar ishi to‘xtab qoladi va saylovlar bo‘yicha ishlab bo‘lmay qoladi”, — deya aniqlik kiritdi Volkov. U Navalniy 2021-yil kuziga belgilangan davlat Dumasiga saylovlarga tayyorgarlik ko‘rishga e’tibor qaratishni so‘raganini qo‘shimcha qildi. Keyingi muxolifat aksiyalari bahor va yozga rejalashtirilgan.

Bundan tashqari, Volkovning so‘zlariga ko‘ra, uning safdoshlari dunyo siyosatchilarining Vladimir Putin bilan har qanday suhbati Navalniy va uning ozod etilishi haqidagi masalaga  borib taqalishiga erishmoqchi.

“Biz uni tashqi siyosiy usullar bilan qamoqdan chiqaramiz”, — dedi Volkov.

Rossiya kuch vakillari “Novichok” bilan zaharlanganidan keyin Germaniyada davolanib, vataniga qaytgan Aleksey Navaniyning qo‘lga olib, qamab qo‘ygandi hamda uning ustidan bo‘lib o‘tgan sud  oqibatida yuzaga kelgan norozilik aksiyalarini shafqatsizlik bilan bostirgandi. “OVD-Info” portal hisob-kitoblariga ko‘ra, Rossiya bo‘ylab 11 mingdan ortiq odam qo‘lga olingan.