Германия, Швеция ва Польша ўз дипломатларининг Россиядан чиқариб юборилишига жавобан, бир нафардан Россия дипломатларини ўз ҳудудларидан ҳайдаб чиқарди, деб ёзади Meduza.
Германия ва Швеция Берлин ва Стокгольмдаги элчихоналар ходимларини, Польша эса Познандаги бош консулхона ходимини persona non grata деб эълон қилди.
Учала мамлакат ташқи сиёсий муассасалари ўз қарорларини деярли бир вақтда эълон қилди.
Россия Ташқи ишлар вазирлиги эса уч мамлакат қарорини «душманларча сиёсат» деб атади.
Россия ТИВ 5 февраль куни Петербургдаги Швеция ва Польша бош консулхоналари ходимларидан, шунингдек, Москвадаги Германия элчихонаси ходимидан мамлакатни тарк этишни талаб қилган эди. Идора маълумотларига кўра, улар 23 январь куни сиёсатчи Алексей Навальний тарафдорларининг акцияларида қатнашган. Швеция унинг дипломати шунчаки акцияни кузатганини, «бу стандарт дипломатик жараён ҳисобланиши»ни маълум қилди.
2 февраль куни 20 га яқин Ғарб дипломатлари Навальнийга нисбатан шартли муддатни ҳақиқийсига ўзгартириш ҳақидаги масала кўриб чиқилаётган суд биносига келган эди. Россия ТИВ буни ички ишларга аралашув деб атади; Буюк Британиянинг Россиядаги элчихонасида эса бу «одатий амалиёт» деб аталди.
Изоҳ (0)