Toshkentda 14 nafar fuqaroni Ukrainada 75 kun davomida moddiy jihatdan o‘ziga qaram qilgan holda og‘ir mehnat sharoitlarida ishlatib, ularning ish haqlarini bermasdan aldab kelgan shaxslar qo‘lga olindi. Bu haqda Bosh prokuratura matbuot xizmati “Daryo”ga ma’lum qildi.
Ma’lum qilinishicha, Bosh prokuratura huzuridagi Departamentning Yashnobod tumani bo‘limi tomonidan fuqaro Q.M. va boshqalarning murojaatiga asosan tergovga qadar tekshiruv o‘tkazilgan. Unda fuqaro M.A. va S.S. oldindan til biriktirib, Q.M. va boshqalarning ishonchiga kirib, ularni Yevropaga oyiga 2—3 ming dollar to‘lanadigan ishga yuborish hamda ishchi vizalarini olib berish evaziga jami 5,5 ming dollarni firibgarlik yo‘li bilan qo‘lga kiritgani aniqlangan.
Bundan tashqari, S.S. va boshqalar jinoiy harakatlarini davom ettirib, 2019-yilning noyabr oyida 14 nafar fuqaroni Kiyev shahrida oyiga 500 AQSh dollari maosh to‘lanadigan qurilish ishlarida ishlab, keyin Yevropa davlatlariga ishga o‘tkazib berishga ko‘ndirgan. Shu yo‘l bilan ularning ishonchini suiiste’mol qilgan shaxslar Kiyevga yetib borishi uchun 2019-yilning 29-noyabrida aviachipta olishga erishib, Kiyevdagi qurilish firmasida ularning pasportini olib qo‘ygan. Ularni 75 kun davomida moddiy jihatdan o‘ziga qaram qilgan holda og‘ir mehnat sharoitlarida ishlatib, 17,5 ming dollar miqdoridagi ish haqlarini bermasdan aldab kelgan.
Shundan so‘ng ushbu fuqarolar Belarusning Gomel shahriga va Moskva shahriga olib borilib, shu yerdan Yevropaga ishchi vizasi olib berilishi haqida takror algandan va ularning mazkur davlatlarda ishsiz yurib, turli qiyinchiliklarga duchor bo‘lishiga sababchi bo‘lgan.
Mazkur holatlar yuzasidan fuqarolar M.A., S.S. va boshqalarga nisbatan Jinoyat kodeksining 168-moddasi (firibgarlik) 2-qismi va 135-moddasi 2-qismi bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Rossiyaning Astraxan viloyati 2021-yilda O‘zbekistondan 10 ming mehnat migrantini qabul qilishga tayyorligini ma’lum qilgani, Rossiyadagi qurilish ishlarida ishlash uchun 249 nafar O‘zbekiston fuqarosi Irkutsk va Amurga va “Gazprom” zavodi atrofidagi qurilishlarda ishlash uchun 231 nafar o‘zbekistonlik Rossiyaga jo‘nab ketgani haqida xabar berilgandi.
Izoh (0)