Тошкентда 14 нафар фуқарони Украинада 75 кун давомида моддий жиҳатдан ўзига қарам қилган ҳолда оғир меҳнат шароитларида ишлатиб, уларнинг иш ҳақларини бермасдан алдаб келган шахслар қўлга олинди. Бу ҳақда Бош прокуратура матбуот хизмати «Дарё»га маълум қилди.
Маълум қилинишича, Бош прокуратура ҳузуридаги Департаментнинг Яшнобод тумани бўлими томонидан фуқаро Қ.М. ва бошқаларнинг мурожаатига асосан терговга қадар текширув ўтказилган. Унда фуқаро М.А. ва С.С. олдиндан тил бириктириб, Қ.М. ва бошқаларнинг ишончига кириб, уларни Европага ойига 2—3 минг доллар тўланадиган ишга юбориш ҳамда ишчи визаларини олиб бериш эвазига жами 5,5 минг долларни фирибгарлик йўли билан қўлга киритгани аниқланган.
Бундан ташқари, С.С. ва бошқалар жиноий ҳаракатларини давом эттириб, 2019 йилнинг ноябрь ойида 14 нафар фуқарони Киев шаҳрида ойига 500 АҚШ доллари маош тўланадиган қурилиш ишларида ишлаб, кейин Европа давлатларига ишга ўтказиб беришга кўндирган. Шу йўл билан уларнинг ишончини суиистеъмол қилган шахслар Киевга етиб бориши учун 2019 йилнинг 29 ноябрида авиачипта олишга эришиб, Киевдаги қурилиш фирмасида уларнинг паспортини олиб қўйган. Уларни 75 кун давомида моддий жиҳатдан ўзига қарам қилган ҳолда оғир меҳнат шароитларида ишлатиб, 17,5 минг доллар миқдоридаги иш ҳақларини бермасдан алдаб келган.
Шундан сўнг ушбу фуқаролар Беларуснинг Гомель шаҳрига ва Москва шаҳрига олиб борилиб, шу ердан Европага ишчи визаси олиб берилиши ҳақида такрор алгандан ва уларнинг мазкур давлатларда ишсиз юриб, турли қийинчиликларга дучор бўлишига сабабчи бўлган.
Мазкур ҳолатлар юзасидан фуқаролар М.А., С.С. ва бошқаларга нисбатан Жиноят кодексининг 168-моддаси (фирибгарлик) 2-қисми ва 135-моддаси 2-қисми билан жиноят иши қўзғатилиб, тергов ҳаракатлари ўтказилмоқда.
Аввалроқ Россиянинг Астрахан вилояти 2021 йилда Ўзбекистондан 10 минг меҳнат мигрантини қабул қилишга тайёрлигини маълум қилгани, Россиядаги қурилиш ишларида ишлаш учун 249 нафар Ўзбекистон фуқароси Иркутск ва Амурга ва «Газпром» заводи атрофидаги қурилишларда ишлаш учун 231 нафар ўзбекистонлик Россияга жўнаб кетгани ҳақида хабар берилганди.
Изоҳ (0)