Vazirlar Mahkamasining 2021-yil 4-fevraldagi qarori bilan Akbar Shukurov Transport vazirligi huzuridagi Avtomobil yo‘llari qo‘mitasi raisining ko‘kalamzorlashtirish va obodonlashtirish masalalari bo‘yicha o‘rinbosari — “O‘zyo‘lko‘kalamzorlashtirish” unitar korxonasi direktori etib tayinlandi. Bu haqda Telegram’dagi “Huquqiy axborot” kanali xabar berdi.
Jizzax shahar hokimi lavozimida 2018-yildan buyon ishlab kelgan Akbar Shukurov 2021-yilning yanvar oyida boshqa lavozimga o‘tganligi munosabati bilan egallab turgan lavozimidan ozod etilgan edi. Uning o‘riniga esa Mirzacho‘l tumani hokimi lavozimida ishlab kelgan Komil Xolmurodov tayinlangandi.
Ma’lumot uchun, Akbar Shukurov 2017-yilning fevral oyidan beri “O‘zbekiston temiryo‘llari” AJ boshqaruv raisi birinchi o‘rinbosari lavozimida faoliyat yuritgan, 2011—2017-yillarda Samarqand shahri hokimi bo‘lgan.
Avvalroq O‘zbekiston Prezidentining 30-yanvardagi farmoni bilan Toshkent viloyati hokimi lavozimidan ozod etilgan Rustam Xolmatov Agrosanoat majmui xodimlari kasaba uyushmasi Respublika kengashi raisi lavozimiga saylanishi kutilayotgani to‘g‘risida xabar berilgandi.
Eslatib o‘tamiz, uy-joy kommunal xizmat ko‘rsatish vaziri sifatida ishlab kelgan Muzaffar Soliyev “faoliyatida yo‘l qo‘ygan kamchiliklar, qayta-qayta ogohlantirishlarga qaramay tegishli xulosa chiqarmagani uchun” egallab turgan lavozimidan ozod qilingandi. 15-yanvar kuni esa u Nurafshon hokimi etib tayinlangan edi.
Izoh (0)