4-fevral kuni Olmaotada Digital Almaty 2021 forumi oldidan O‘zbekiston bosh vaziri Abdulla Aripov Rossiya bosh vaziri Mixail Mishustin bilan uchrashdi, deb xabar bermoqda Rossiya hukumati matbuot xizmati.
Xabarda aytilishicha, O‘zbekiston Prezidentining davlat tashrifi bilan Rossiyaga kelishiga tayyorgarlik ko‘rilmoqda. Shuningdek, imzolash uchun bir qator hujjatlar to‘plami ishlab chiqilishi, mazmunga boy dastur tayyorlanishi aytilgan.
“Rossiya va O‘zbekiston hukumat rahbarlari darajasida Qo‘shma komissiyaning ikkinchi yig‘ilishi davlat tashrifiga tayyorlashning juda muhim bosqichi bo‘ladi. Bu ikki tomonlama hamkorlikning ko‘lami va ahamiyatini ko‘rsatadi. Afsuski, sanitariya-epidemiologik cheklovlar tufayli bizning tadbirlar mart—aprel oylariga qoldirildi”, — deyiladi xabarda.
Shuningdek, uchrashuvda ommaviy vaksinatsiya jarayonidagi o‘zaro hamkorlik qilinayotgani ta’kidlangan.
Koronavirus pandemiyasiga qaramay, 2020-yilning 11 oyi davomida mamlakatlar o‘rtasidagi o‘zaro tovar aylanmasi 2019-yilning shu davriga nisbatan 17 foizga oshib, jami 5,3 milliard dollarni tashkil qilgani qayd etilgan.
“Prezidentlar o‘z oldiga ushbu ko‘rsatkichni 10 milliardgacha oshirishni maqsad qilgan. O‘ylaymanki, bu borada biz siz bilan qo‘ldan kelgancha harakat qilamiz”, — degan Mixail Mishustin.
Shavkat Mirziyoyev 2021-yilda Rossiyaga davlat tashrifi bilan borishi haqida O‘zbekiston tashqi ishlar vaziri Abdulaziz Komilovning 21-dekabr kuni rossiyalik hamkasbi Sergey Lavrov bilan uchrashuvida ham aytib o‘tilgan.
Bosh vazir Abdulla Aripovning matbuot xizmati vakili Bekzod Hidoyatovning ma’lum qilishicha, Shavkat Mirziyoyevning Rossiyaga tashrifi mart—aprel oylarida bo‘lishi kutilayotgani mazmunida xabarlar tarqatilmoqda. U Olmaotada bo‘lib o‘tgan uchrashuvda Shavkat Mirziyoyevning Moskvaga tashrifi emas, hukumat rahbarlari darajasidagi Qo‘shma komissiyaning navbatdagi yig‘ilishini o‘tkazish masalasi muhokama qilinganini ta’kidlagan.
Eslatib o‘tamiz, Shavkat Mirziyoyev Rossiyada oxirgi marta 2020-yilning iyun oyida amaliy tashrif bilan bo‘lgan edi.
Izoh (0)