Qirg‘izistonda bir hafta ichida ikkinchi sobiq bosh vazir qamoqqa olindi

Qirg‘iziston sobiq bosh vaziri, parlament deputati Kubanichbek Jumaliyev  korrupsiyada gumonlanib, qo‘lga olindi va qamab qo‘yildi, deb xabar bermoqda “Interfaks” Qirg‘iziston Milliy xavfsizlik davlat qo‘mitasiga tayanib.

Tergov ma’lumotlariga ko‘ra, Jumaliyev deputat va ayni vaqtda Qirg‘izistondagi Xalqaro tibbiyot universitetining haqiqiy egasi bo‘la turib, bosim o‘tkazish va ta’lim sohasidagi qonun loyihalarini lobbilashtirishda o‘z siyosiy ta’siridan foydalanish orqali ta’lim faoliyatini olib borish huquqi uchun litsenziyani noqonuniy yo‘l bilan qo‘lga kiritgan.

Dastlab litsenziya komissiyasi tibbiyot universitetiga qonunchilik talablariga javob bermaganligi uchun litsenziya berishdan bosh tortgan. Ammo Jumaliyevning Ta’lim va fan vazirligi rahbariyatiga bosimi tufayli komissiya xulosasi ijobiy tomonga o‘zgartirilgan.

Milliy xavfsizlik davlat qo‘mitasida ma’lum qilishlaricha, bundan tashqari, Jumaliyev hamda unga bog‘liq shaxslar va xo‘jalik subyektlari tomonidan noqonuniy boyish, jinoiy daromadlarni qonuniylashtirish va o‘ta yirik miqdorda soliqlarni to‘lashdan bosh tortish holatlari aniqlangan.

“Ayni paytda Jumaliyevga, uning qarindoshlariga va unga bog‘liq shaxslarga tegishli bo‘lgan taxminan 78 ta ko‘chmas mulk obyektlari va turli kompaniyalar, shu jumladan, savdo markazlari, ta’lim va tibbiyot muassasalari, mehmonxonalar, foydali qazilmalar konlari, teleradiokompaniya va metallurgiya kombinati aniqlandi, ular avvalroq xususiylashtirish yo‘li bilan xususiy mulkka aylantirilgan”, — deya qo‘shimcha qilishdi Qirg‘iziston Milliy xavfsizlik davlat qo‘mitasidan.

Jumaliyev 1996—1998-yillarda Qirg‘iziston bosh vaziri lavozimida ishlagan. 2015-yildan u parlamentda “Bir bo‘l” fraksiyasidan deputat hisoblanadi.

Eslatib o‘tamiz, Qirg‘izistonning yana bir sobiq bosh vaziri Muhammadkaliy Abilgaziyev noqonuniy yo‘llar bilan boylik orttirganlikda gumonlanib 26-yanvar kuni ushlangan va 28-yanvar kuni qamoqqa olingan edi. U sud qaroriga ko‘ra 2021-yil 26-martga qadar qamoqda ushlab turiladi. Qirg‘iziston hukumatining sobiq rahbari Abilgaziyev 2018–2020-yillar davomida Vazirlar mahkamasini boshqargan. U 26-yanvar kuni katta maydondagi yer uchastkalarini noqonuniy ravishda ajratib berish va qonunga xilof ravishda boylik orttirish jinoyatlarini amalga oshirganlikda gumon qilinmoqda.