Қирғизистонда бир ҳафта ичида иккинчи собиқ бош вазир қамоққа олинди

Қирғизистон собиқ бош вазири, парламент депутати Кубаничбек Жумалиев  коррупцияда гумонланиб, қўлга олинди ва қамаб қўйилди, деб хабар бермоқда «Интерфакс» Қирғизистон Миллий хавфсизлик давлат қўмитасига таяниб.

Тергов маълумотларига кўра, Жумалиев депутат ва айни вақтда Қирғизистондаги Халқаро тиббиёт университетининг ҳақиқий эгаси бўла туриб, босим ўтказиш ва таълим соҳасидаги қонун лойиҳаларини лоббилаштиришда ўз сиёсий таъсиридан фойдаланиш орқали таълим фаолиятини олиб бориш ҳуқуқи учун лицензияни ноқонуний йўл билан қўлга киритган.

Дастлаб лицензия комиссияси тиббиёт университетига қонунчилик талабларига жавоб бермаганлиги учун лицензия беришдан бош тортган. Аммо Жумалиевнинг Таълим ва фан вазирлиги раҳбариятига босими туфайли комиссия хулосаси ижобий томонга ўзгартирилган.

Миллий хавфсизлик давлат қўмитасида маълум қилишларича, бундан ташқари, Жумалиев ҳамда унга боғлиқ шахслар ва хўжалик субъектлари томонидан ноқонуний бойиш, жиноий даромадларни қонунийлаштириш ва ўта йирик миқдорда солиқларни тўлашдан бош тортиш ҳолатлари аниқланган.

«Айни пайтда Жумалиевга, унинг қариндошларига ва унга боғлиқ шахсларга тегишли бўлган тахминан 78 та кўчмас мулк объектлари ва турли компаниялар, шу жумладан, савдо марказлари, таълим ва тиббиёт муассасалари, меҳмонхоналар, фойдали қазилмалар конлари, телерадиокомпания ва металлургия комбинати аниқланди, улар аввалроқ хусусийлаштириш йўли билан хусусий мулкка айлантирилган», — дея қўшимча қилишди Қирғизистон Миллий хавфсизлик давлат қўмитасидан.

Жумалиев 1996—1998 йилларда Қирғизистон бош вазири лавозимида ишлаган. 2015 йилдан у парламентда «Бир бўл» фракциясидан депутат ҳисобланади.

Эслатиб ўтамиз, Қирғизистоннинг яна бир собиқ бош вазири Муҳаммадкалий Абилгазиев ноқонуний йўллар билан бойлик орттирганликда гумонланиб 26 январь куни ушланган ва 28 январь куни қамоққа олинган эди. У суд қарорига кўра 2021 йил 26 мартга қадар қамоқда ушлаб турилади. Қирғизистон ҳукуматининг собиқ раҳбари Абилгазиев 2018–2020 йиллар давомида Вазирлар маҳкамасини бошқарган. У 26 январь куни катта майдондаги ер участкаларини ноқонуний равишда ажратиб бериш ва қонунга хилоф равишда бойлик орттириш жиноятларини амалга оширганликда гумон қилинмоқда.