Jo Bayden Rossiyani zudlik bilan Navalniyni ozod qilishga chaqirdi

AQSh prezidenti Jo Bayden Davlat departamentidagi dasturiy nutqida Rossiya hukumatini zudlik bilan Aleksey Navalniyni ozod qilishga chaqirishini ma’lum qildi, deb yozadi “RBK”.

“Navalniyning siyosiy sabab bilan hibsga olinishi va Rossiyaning mitinglar o‘tkazish erkinligini bo‘g‘ishga urinishlari — bizda va butun dunyo hamjamiyatida chuqur xavotir uyg‘otadigan masala”, — dedi Bayden. “Navalniy korrupsiyani aniqlagani uchun nishonga aylandi. U zudlik bilan va hech qanday shartlarsiz ozod etilishi kerak”, — dedi u.

Baydenning ta’kidlashicha, mamlakat hukumati Rossiyaga xarajatlarni oshirish va o‘zining juda muhim manfaatlarini himoya qilish oldida ikkilanmaydi. “Rossiya tomonidan tajovuzkor xatti-harakatlar, saylovlarimizga aralashuvlar, kiberhujumlar, o‘z fuqarolarining zaharlanishi qarshisida AQSh yon bosadigan davrlar o‘z nihoyasiga yetdi”, — deya ma’lum qildi u.

Avvalroq Navalniyni ozod qilish talabi bilan AQSh davlat kotibi Entoni Blinken chiqqan edi. U Vashington muxolifatchiga nisbatan munosabatni uning huquqlari buzilishi va “siyosiy plyuralizmning bostirilishi” deb baholashini ma’lum qilgandi.

Bundan tashqari, Germaniya kansleri Angela Merkel, Fransiya prezidenti Emmanuel Makron, Buyuk Britaniya bosh vaziri Boris Jonson, Avstriya kansleri Sebastyan Kurs ham Moskvadan Navalniyni ozod etishni talab qilgan, Chexiya TIV esa Rossiya elchisiga sud qarori munosabati bilan norozilik bildirgan edi.

AQSh davlat kotibi Entoni Blinken Rossiya tashqi ishlar vaziri Sergey Lavrov bilan ilk telefon suhbatida xakerlik hujumlari va Rossiyaning Amerikadagi saylovlarga aralashuvi mavzularini ko‘targan.

Avvalroq esa Jo Bayden Rossiyaning xakerlik hujumlariga aloqadorligini va saylovlarga aralashuvini tekshirishni buyurgan edi.

2-fevral kuni sud Navalniyga “Iv Roshe” ishi bo‘yicha berilgan shartli muddatni haqiqiysiga almashtirdi va 2 yil-u 8 oy koloniya tayinladi. G‘arb mamlakatlari siyosatchini ozod etishni talab qildi. Moskva va Peterburgda uni qo‘llab-quvvatlab aksiyalar o‘tkazildi. Moskvaning o‘zida namoyishchilarga qarshi 8 mingdan ortiq politsiyachilar va gvardiyachilar jalb qilindi. Ular bir yarim ming kishini hibsga oldi.