O‘zbekistondagi 14 446 ta ko‘prik va yo‘l o‘tkazgichning 5 476 tasi ta’mirtalab ahvolda. Bu haqda AOKA o‘tkazilgan matbuot anjumanida “Ko‘prikqurilishfoydalanish” unitar korxonasi rahbari Anorboy Annaqulov ma’lum qildi.
Unitar korxona faoliyati davomida umumiy uzunligi 140 kilometrdan ziyod 1424 ta ko‘prik, yo‘l o‘tkazgich va tunnel qurib bitkazilgan. Umumiy uzunligi 13 kilometrli 270 ta sun’iy inshoot barpo etilgan.
Xatlov natijalariga ko‘ra respublika hududidagi mavjud ko‘prik va yo‘l o‘tkazgichlarning umumiy soni 14 446 donani tashkil etadi. Ushbu ko‘priklarning texnik holati vizual o‘rganilganda 5 476 tasi ta’mirtalab ekanligi aniqlandi.
Ta’kidlanishicha, aksariyat ta’mirtalab ko‘priklar ancha oldin qurilgan bo‘lib, ushbu ko‘priklarning bugungi kunda yuk transport vositalarini ko‘tarish qobiliyatiga mos kelmaydi.
Avtomobil yo‘llari qo‘mitasi tomonidan 2020-yilda 100 dan ortiq ko‘prik va yo‘l o‘tkazgichlarni ta’mirlash ishlari bajarilib, foydalanishga topshirildi.
Qayd etilishicha, 2021-yilda ushbu ko‘rsatkichlarni bir baravarga ko‘tarish rejalashtirilgan bo‘lib, 200 dan ortiq ko‘prik va yo‘l o‘tkazgichlarni ta’mirlash ishlarini amalga oshirilishi ko‘zda tutilmoqda.
Mazkur ta’mirtalab va yaroqsiz ko‘priklarni ta’mirlash ishlari uchun dastlabki hisob-kitoblarga ko‘ra, jami 16 trillion so‘m miqdorda mablag‘ talab etiladi.
Avvalroq Yunusoboddagi “Universam” ko‘prigining bir tomoni ta’mirlash ishlarini tezlashtirish uchun to‘liq yopilgani, andijonlik o‘quvchining buzilgan ko‘prik masalasida hokimga murojaatidan so‘ng ko‘prik ta’miri boshlab yuborilgani hamda Namanganda qurilayotgan ko‘prik qulashi oqibatida talafotlar bo‘lmagani haqida xabar berilgandi.
Izoh (0)