Yunusoboddagi kredit do‘konida o‘g‘rilik qilib, 58,5 mln so‘m zarar yetkazgan 4 kishi ushlandi

Yunusoboddagi kredit do‘konida o‘g‘rilik qilgan 4 nafar shaxsga nisbatan jinoiy ish ochildi. Bu haqda IIV Tergov departamenti xabar berdi.

Ma’lum bo‘lishicha, 27-yanvar kuni soat 03:00 larda noma’lum shaxslar o‘zaro jinoiy til biriktirib, o‘zganing mol-mulkini yashirin ravishda talon-toroj qilish maqsadida Yunusobod tumani dehqon bozori oldiga joylashgan maishiy texnika do‘konining 3 million so‘mlik eshigini sindirib, do‘kon ichiga g‘ayriqonuniy ravishda kirgan.

So‘ng 31 yoshli Sanjar T.ga tegishli turli rusumdagi 14 dona uyali telefon apparati va Amazfit rusumli bir dona qo‘l soatini o‘g‘irlab, jami 58 million 588 ming so‘m moddiy zarar yetkazib, hodisa joyidan yashiringan.

Olib borilgan tergovga qadar tekshiruv harakatlari natijasida mazkur jinoyatni 39 yoshli Umid A., 18 yoshli Azizbek A., 28 yoshli Sherzod R. va 22 yoshli Azamat N. sodir qilgani aniqlanib, mazkur do‘konda o‘g‘irlangan texnika vositalarining bir qismi ashyoviy dalil tariqasida rasmiylashtirib olingan. Qolgan texnika vositalarini qayerda va kimga sotganliklari aniqlanmoqda.

Holat yuzasidan Umid A. va uning jinoiy sheriklariga nisbatan Jinoyat kodeksining 169-moddasi (o‘g‘rilik) 2-qismi “b”, “v”, “g” bandlari  bilan jinoyat ishi qo‘zg‘atilgan bo‘lib, hozirda gumon qilinuvchi shaxslar protsessual tartibda ushlangan.