Toshkent xalqaro aeroportida qizlarni Turkiyaga fohishalikka yuborgani uchun 8 yilga qamalib, afv etilgan ayol yana shu jinoyati uchun ushlandi

Toshkent xalqaro aeroportida 2021-yilning 28-yanvarida bir qizni Turkiyaga fohishalik bilan shug‘ullanish uchun yuborayotgan ikki ayol qo‘lga olindi.

IIV huzuridagi Tergov departamenti xabariga ko‘ra, 28 yoshli Shoira N. va 32 yoshli Nilufar R. Muxlisa ismli qizga Turkiyaning Istanbul shahrida fohishalik bilan shug‘ullanish orqali moddiy mablag‘ orttirishni taklif qilib, yo‘lkira va boshqa xarajatlarini to‘lab berishni va’da qilgan. Rejaga ko‘ra, qizni u yerdagi jinoiy sheriklari Nargiza G. qarshi olishi kerak bo‘lgan.

Ular qizni Toshkent xalqaro aeroporti orqali yuborayotgan vaqtida huquqni muhofaza qiluvchi organ xodimlari tomonidan ushlangan.

Holat yuzasidan Samarqand shahri IIO FMB huzuridagi Tergov bo‘limi tomonidan Shoira N. va Nilufar R.ga nisbatan Jinoyat kodeksning 135-moddasi 2-qismi “e” bandi (bir guruh shaxslar tomonidan oldindan til biriktirib odam savdosi bilan shug‘ullanish) bilan jinoyat ishi qo‘zg‘atilgan.

Dastlabki tergov davomida Shoira N. muqaddam shu kabi sodir qilgan xatti-harakatlari tufayli Jinoyat kodeksning 135-moddasi 3-qismi “a” bandi (o‘g‘irlash, zo‘rlik ishlatish yoki zo‘rlik ishlatish bilan qo‘rqitish yoxud majburlashning boshqa shakllarini qo‘llash orqali odam savdosi bilan shug‘ullanish) bilan sudlanib, 8 yil muddatga ozodlikdan mahrum qilinib, afv etilganligi aniqlandi.

Holat yuzasidan dastlabki tergov harakatlari davom etmoqda.