Ўзбекистондаги 14 446 та кўприк ва йўл ўтказгичнинг 5 476 таси таъмирталаб аҳволда. Бу ҳақда АОКА ўтказилган матбуот анжуманида «Кўприкқурилишфойдаланиш» унитар корхонаси раҳбари Анорбой Аннақулов маълум қилди.
Унитар корхона фаолияти давомида умумий узунлиги 140 километрдан зиёд 1424 та кўприк, йўл ўтказгич ва туннел қуриб битказилган. Умумий узунлиги 13 километрли 270 та сунъий иншоот барпо этилган.
Хатлов натижаларига кўра республика ҳудудидаги мавжуд кўприк ва йўл ўтказгичларнинг умумий сони 14 446 донани ташкил этади. Ушбу кўприкларнинг техник ҳолати визуал ўрганилганда 5 476 таси таъмирталаб эканлиги аниқланди.
Таъкидланишича, аксарият таъмирталаб кўприклар анча олдин қурилган бўлиб, ушбу кўприкларнинг бугунги кунда юк транспорт воситаларини кўтариш қобилиятига мос келмайди.
Автомобиль йўллари қўмитаси томонидан 2020 йилда 100 дан ортиқ кўприк ва йўл ўтказгичларни таъмирлаш ишлари бажарилиб, фойдаланишга топширилди.
Қайд этилишича, 2021 йилда ушбу кўрсаткичларни бир бараварга кўтариш режалаштирилган бўлиб, 200 дан ортиқ кўприк ва йўл ўтказгичларни таъмирлаш ишларини амалга оширилиши кўзда тутилмоқда.
Мазкур таъмирталаб ва яроқсиз кўприкларни таъмирлаш ишлари учун дастлабки ҳисоб-китобларга кўра, жами 16 триллион сўм миқдорда маблағ талаб этилади.
Аввалроқ Юнусободдаги «Универсам» кўпригининг бир томони таъмирлаш ишларини тезлаштириш учун тўлиқ ёпилгани, андижонлик ўқувчининг бузилган кўприк масаласида ҳокимга мурожаатидан сўнг кўприк таъмири бошлаб юборилгани ҳамда Наманганда қурилаётган кўприк қулаши оқибатида талафотлар бўлмагани ҳақида хабар берилганди.
Изоҳ (0)