Tanzaniya tibbiyot tizimi mamlakatga koronavirusga qarshi vaksinani olib kelish va aholini emlashni tashkil qilmoqchi emas. Bu haqda mamlakat sog‘liqni saqlash vaziri Doroti Gvajimuning so‘zlariga tayanib, Al Arabia telekanali xabar qilgan.
“Sog‘liqni saqlash vazirligi COVID-19’ga qarshi vaksinalarni olishni rejalashtirmayapti”, — degan vazir maxsus matbuot anjumani vaqtida.
Gvajimuning so‘zlariga ko‘ra, tanzaniyaliklar mazkur infeksiya xavfidan xoli hududda yashamoqda. Vazir fuqarolarga gigiyena me’yorlariga rioya qilish, shuningdek, zarurat tug‘ilganda ingalyatsiyadan foydalanishni tavsiya etgan.
Tanzaniya kimyoviy preparatlar bo‘yicha davlat xizmatining rahbari Fideliche Mefumiko virusdan dorivor giyohlar yordamida davolanishni maslahat bergan.
Yanvar oyida Tanzaniya prezidenti Jon Magufuli mamlakatda koronavirusning yo‘qligi va shu sababli ham COVID-19’dan himoyalanish uchun vaksina xarid qilinmasligini bildirgan.
Tanzaniya hukumati 2020-yil aprel oyidan beri mamlakatdagi kasallanish holati yuzasidan statistikani e’lon qilmay kelmoqda, o‘sha vaqtda koronavirusga chalinganlar soni 509 nafarni tashkil qilgan. Tanzaniyada mamlakatdagi koronavirus bilan bog‘liq vaziyatni muhokama qilish taqiqlab qo‘yilgan. Keyinchalik echki va papayyada koronavirus aniqlangandan so‘ng ushbu mamlakat Sog‘liqni saqlash milliy laboratoriyasi rahbari ishdan bo‘shatilgandi.Yanvar oxirida Jahon sog‘liqni saqlash tashkilotining Afrika mintaqasi bo‘yicha direktori Matshidiso Moeti Tanzaniya hukumatidan koronavirus bo‘yicha ma’lumotlarni taqdim etishni so‘ragan. JSST mutaxassislari Afrikada qit’adagi bitta mamlakat ham infeksiyaga qarshi kurashda samarali va sinalgan usullardan foydalanmasa ham hududda kasallik bilan kurashish qiyin kechishi mumkinligidan xavotirda.
28-yanvarda Moeti Afrikada jami 175 mingta kasallanish holati kuzatilgani va 6,2 mingdan ziyod bemor infeksiya asoratlari oqibatida vafot etganini ma’lum qilgan. 2020-yil 29-dekabrdan 2021-yil 25-yanvargacha bo‘lgan oraliqda COVID-19’ga chalinganlar soni avvalgi haftalardagi ko‘rsatkichga nisbatan 50 foizga ko‘paygan.
Afrikada Misr, Jazoir, Gvineya, Tunis va Marokash kabi davlatlarda aholini koronavirusga qarshi emlash ishlari boshlangan.
Izoh (0)