Танзанияда аҳолини COVID-19’га қарши вакцинация қилмасликка қарор қилинди

Танзания тиббиёт тизими мамлакатга коронавирусга қарши вакцинани олиб келиш ва аҳолини эмлашни ташкил қилмоқчи эмас. Бу ҳақда мамлакат соғлиқни сақлаш вазири Дороти Гважимунинг сўзларига таяниб, Al Arabia телеканали хабар қилган.

«Соғлиқни сақлаш вазирлиги COVID-19’га қарши вакциналарни олишни режалаштирмаяпти», — деган вазир махсус матбуот анжумани вақтида.

Гважимунинг сўзларига кўра, танзанияликлар мазкур инфекция хавфидан холи ҳудудда яшамоқда. Вазир фуқароларга гигиена меъёрларига риоя қилиш, шунингдек, зарурат туғилганда ингаляциядан фойдаланишни тавсия этган.

Танзания кимёвий препаратлар бўйича давлат хизматининг раҳбари Фиделиче Мефумико вирусдан доривор гиёҳлар ёрдамида даволанишни маслаҳат берган.

Январь ойида Танзания президенти Жон Магуфули мамлакатда коронавируснинг йўқлиги ва шу сабабли ҳам COVID-19’дан ҳимояланиш учун вакцина харид қилинмаслигини билдирган.

Январь охирида Жаҳон соғлиқни сақлаш ташкилотининг Африка минтақаси бўйича директори Мацҳидисо Моэти Танзания ҳукуматидан коронавирус бўйича маълумотларни тақдим этишни сўраган. ЖССТ мутахассислари Африкада қитъадаги битта мамлакат ҳам инфекцияга қарши курашда самарали ва синалган усуллардан фойдаланмаса ҳам ҳудудда касаллик билан курашиш қийин кечиши мумкинлигидан хавотирда.

28 январда Моэти Африкада жами 175 мингта касалланиш ҳолати кузатилгани ва 6,2 мингдан зиёд бемор инфекция асоратлари оқибатида вафот этганини маълум қилган. 2020 йил 29 декабрдан 2021 йил 25 январгача бўлган оралиқда COVID-19’га чалинганлар сони аввалги ҳафталардаги кўрсаткичга нисбатан 50 фоизга кўпайган.

Африкада Миср, Жазоир, Гвинея, Тунис ва Марокаш каби давлатларда аҳолини коронавирусга қарши эмлаш ишлари бошланган.