Hindistondagi namoyishlar fonida 250 ga yaqin hind akkaunti 1-fevral kuni bloklandi, deb xabar berdi Reuters. Akkauntlar orasida The Caravan India nashri, siyosiy sharhlovchi Sanjukta Basu, shuningdek, dehqonlar noroziligiga aloqador deb topilgan Kisan Ekta Morcha va Traktor2Twitr sahifalari bor.
Bloklash hukumatning rasmiy talabiga binoan amalga oshirilgan. Hukumat sahifalarni zo‘ravonlikka da’vat etayotganida ayblagan. Taqiq taxminan 12 soat davom etgan va faqatgina hind foydalanuvchilarga tatbiq etilgan. Boshqa mamlakatlarda sahifalar bloklanmagan.
Reuters’ning Hindiston hukumatidagi manbasiga ko‘ra, hukumat #modiplanningfarmersgenocide (Modi fermerlarni qirg‘in qilishni rejalashtirmoqda) xeshtegidan foydalangan akkauntlarni blokirovka qilishni buyurgan.
Hindu Times’ning ta’kidlashicha, blokirovka Twitter vakillari Hindiston rasmiylari bilan uchrashgandan so‘ng amalga oshirilgan. Uchrashuv davomida ijtimoiy tarmoq xodimlari blokirovka qilish platforma qoidalariga zid ekanligini tushuntirgan.
Ma’lumot uchun, Hindiston poytaxti Nyu-Dehlida fermer va dehqonlarning ommaviy namoyishlari noyabr oyining oxirlaridan beri bo‘lib o‘tmoqda. Ular yangi qonun loyihasini bekor qilishni talab qilmoqda. Qonunga ko‘ra yer egalari qishloq xo‘jaligi kompaniyalari bilan mustaqil ravishda ekinlarni sotish bo‘yicha bitimlar tuzishi va o‘z mahsulotlarini mamlakatning istalgan joyiga sotishlari mumkin. Namoyishchilar bu fermer xo‘jaliklarini yirik korporatsiyalar tomonidan tortib olinishiga olib keladi, deb hisoblamoqda.
O‘n minglab fermerlar 26-yanvar Respublika kunida kelishilgan aksiyada qatnashish uchun traktorlar, mototsikllar, otlar bilan poytaxtga kelganlarida norozilik namoyishlari avj oldi. Ammo ko‘p o‘tmay namoyishchilar dubinkalar va ko‘zdan yosh oqizuvchi gaz ishlatgan xavfsizlik kuchlari bilan to‘qnashuvlar yuzaga keldi.
CNN Nyu-Dehli chekkasida internet bloklangani haqida xabar berdi. To‘qnashuvlar natijasida yuzdan ortiq namoyishchilar jarohat olgan, bir kishi vafot etgan, deb yozadi New York Times.
Hindiston hukumati norozilik namoyishlariga qaramay islohotni davom ettirishini aytdi. Twitter qoidalarida kompaniya talab qilingan paytda rasmiy buyurtmalarni bajarishi ta’kidlangan.
Avvalroq Hindistonda koronavirusning tarqalish sur’atlari sekinlashgani hamda hindistonlik ayol pasportini yo‘qotib qo‘ygani uchun 18 yil Pokiston qamoqxonasida o‘tirgani haqida xabar berilgandi.
Izoh (0)