Ijtimoiy tarmoqlarda tarqalgan videolar sabab 8 nafar ichki ishlar xodimi tizimdan bo‘shatilgan, 20 nafari lavozimidan ozod etilgan. Bu haqda AOKAda bo‘lgan matbuot anjumanida IIV kadrlar boshqarmasi boshlig‘i o‘rinbosari Avazbek In’omov ma’lum qildi.
“Ichki ishlar organlari xodimlari va fuqarolar o‘rtasidagi salbiy holatlar aks ettirilgan 201 ta videorolik ijtimoiy tarmoqlarda keng muhokamaga sabab bo‘lgan.
Kadrlar bosh boshqarmasi hamda O‘z xavfsizlik bo‘linmalari bilan hamkorlikda har bitta holat bo‘yicha tekshirish o‘tkazib, 87 nafar xodimga nisbatan intizomiy jazo chorasi qo‘llanilgan. Shundan 8 nafari ichki ishlar tizimidan bo‘shatilgan. 20 nafari esa egallab turgan lavozimidan ozod etilgan”, – deydi Avazbek In’omov.
Shuningdek, 201 ta videorolikdan 84 ta holatda xodimlar aybi tasdiqlanmagan va 22 ta holat bo‘yicha fuqarolarga nisbatan ma’muriy javobgarlik, 9 ta holatda jinoiy ish qo‘zg‘atilgani ma’lum qilindi.
Avvalroq Buxoroda YPX inspektorini Tico kapotida sudrab ketgan haydovchi 15 sutkaga qamalgani, Toshkentda mast holda avtomobil boshqarib, YPX xodimlari bilan janjal uyushtirgan sobiq deputat jarimaga tortilgani hamda Termizda xizmat mashinasida yo‘l qoidasini buzgan YPX xodimi jarimaga tortilgani haqida xabar berilgandi.
Izoh (0)