Xonanda Jasur Umirovga nisbatan nomusga tegish ishi bo‘yicha dastlab jinoiy ish qo‘zg‘atishni rad etgan Kattaqo‘rg‘on IIB Tergov bo‘limi tergovchisining harakatlari prokuratura tomonidan o‘rganilmoqda. Bu haqda Samarqand viloyati prokuraturasi ma’lum qildi.
Voyaga yetmagan Sh.M.ni majburlab nomusiga tegganligi holati yuzasidan Jasur Umirovga nisbatan qo‘zg‘atilgan jinoyat ishi sud tomonidan ko‘rib chiqilib, xonanda va uning ikki sherigi aybdor deb topilib, ularga ozodlikdan mahrum qilish jazosi tayinlangandi.
“Hozirda ushbu holat bo‘yicha dastlab tergovga qadar tekshirish harakatlari olib borib, yuz bergan holatda biror-bir shaxsning harakatida jinoyat alomatlari mavjud emasligi haqidagi asos bilan JPKning 83-moddasi 2-bandiga asosan jinoyat ishi qo‘zg‘atishni rad etish haqida qaror qabul qilgan Kattaqo‘rg‘on tuman IIB TB tergovchisining harakatlari bo‘yicha Kattaqo‘rg‘on shahar prokuraturasi tomonidan tergovga qadar tekshirish harakatlari olib borilmoqda”, — deyiladi Samarqand viloyati prokuraturasi xabarida.
Viloyat prokuraturasi tomonidan Telegram’da e’lon qilingan xabarda odatda mansabdorlar pora bilan qo‘lga tushganda qo‘llaniladigan illyustrativ suratdan foydalanilgan. Unda cho‘ntagidan bir qancha dollar ko‘rinib turgan erkakning qo‘liga kishan solingani tasvirlangan.
Eslatib o‘tamiz, 2020-yil 17-iyun kuni Urgut tumanida yashovchi fuqaro F.R. Kattaqo‘rg‘on tumani IIB boshlig‘iga ariza bilan murojaat qilgan. Unda 13-iyun kuni voyaga yetmagan qizi Sh.M.ni dugonasi D.S. Kattaqo‘rg‘on tumaniga olib kelib, uni qo‘shiqchi Jasur Umirov va uning bir o‘rtog‘i bilan tanishtirgani, ular qizlarni bir uyga olib borganligi va shu kuni xonanda qizi Sh.M.ni zo‘rlab nomusiga tegganligini, shu sababli Jasur Umirovga nisbatan qonuniy chora ko‘rishni so‘ragan.
Sudga oid tibbiyot ekspertizaning 26-iyundagi xulosasida fuqaro Sh.M.ning tanasida, ya’ni ko‘z yuqori qovoqlar, ikkala boldir, o‘ng bilak sohalarida qontalashlar kabi jarohatlar aniqlanib, ushbu jarohatlar sud-tibbiy tekshiruviga qadar bir kundan ko‘p, ikki kundan kam bo‘lgan vaqt oralig‘ida yetkazilgan bo‘lishi mumkinligi ko‘rsatilgan.
Mazkur murojaat yuzasidan Kattaqo‘rg‘on tuman IIB huzuridagi TB tergovchisi tomonidan tergovga qadar tekshirish harakatlari o‘tkazilib, unga ko‘ra, 10-iyul kuni Jinoyat protsessual kodeksining 83-moddasi 2-bandiga (gumonlanuvchining qilmishida jinoyat tarkibi bo‘lmasa, aybsiz deb topish) asosan jinoyat ishi qo‘zg‘atishni rad etish haqida qaror qabul qilingan.
Oradan ikki oy o‘tib — 10-sentabr kuni “Kun.uz” saytida voyaga yetmagan qizning nomusiga teggani aytilgan xonandaga nisbatan IIB jinoyat ishi qo‘zg‘atishni rad qilgani haqida maqola e’lon qilindi. Maqolada Sh.M. xonanda unga mast qiluvchi ichimlik ichirib, keyin kuch ishlatib zo‘rlaganini, Jasur Umirovning sheriklari unga pichoq o‘qtalib qo‘rqitganini so‘zlab bergan. Xonandaning o‘zi nashr bilan suhbatda qizning xohishi bilan jinsiy aloqada bo‘lgani, qizning voyaga yetmaganidan bexabar bo‘lganini aytgan. Shuningdek, qizning otasi shantaj qilib, undan uy talab qilganini ta’kidlagan.
11-sentabr kuni Bosh prokuratura bayonot berdi. Unda “to‘plangan hujjatlar Samarqand viloyati prokuraturasi tomonidan nazorat tartibida o‘rganib chiqilganda, bir qator tergovga qadar tekshiruv harakatlari to‘liq bajarilmaganligi, tergovchi Jinoyat protsessual kodeksining 22-moddasida ko‘rsatilgan jinoyat yuz berganligini, uning sodir etilishida kim aybdorligini, shuningdek, u bilan bog‘liq barcha holatlarni aniqlash shartligini, ish bo‘yicha isbotlanishi lozim bo‘lgan barcha holatlar sinchkovlik bilan har tomonlama, to‘la va xolisona tekshirib ko‘rilmasdan shoshma-shosharlik bilan qabul qilinganligi aniqlangan”ligi aytilgan. Shu sababli Kattaqo‘rg‘on tuman IIB huzuridagi TBning 10-iyul kungi jinoyat ishi qo‘zg‘atishni rad etish to‘g‘risida qabul qilgan qaror Samarqand viloyati prokuraturasi tomonidan 10-sentabr kuni bekor qilinib, qo‘shimcha tekshiruv harakatlari olib borilishlik uchun Kattaqo‘rg‘on tuman IIB TBga yuborilgan.
Keyinroq Samarqand viloyati IIB huzuridagi Tergov boshqarmasi tomonidan jinoyat ishi qo‘zg‘atilib, 21-dekabr kuni esa Jasur Umirov qamoqqa olingandi.
2021-yil 2-fevral jinoyat ishlari bo‘yicha Kattaqo‘rg‘on shahar sudida Jasur Umirov va uning ikki sherigiga nisbatan jinoyat ishini ko‘rib chiqish bo‘yicha sud jarayoni nihoyasiga yetdi va sud hukmi e’lon qilindi. Hukmga ko‘ra, Jasur Umirov Jinoyat kodeksining 118-moddasi (nomusga tegish) 1-qismi bilan aybli deb topilib, unga 5 yil muddatga ozodlikdan mahrum qilish jazosi tayinlandi. Uning ikki sherigi esa 1,5 yilga ozodlikdan mahrum qilindi.
Izoh (0)