Ижтимоий тармоқларда тарқалган видеолар сабаб 8 нафар ички ишлар ходими тизимдан бўшатилган, 20 нафари лавозимидан озод этилган. Бу ҳақда АОКАда бўлган матбуот анжуманида ИИВ кадрлар бошқармаси бошлиғи ўринбосари Авазбек Инъомов маълум қилди.
«Ички ишлар органлари ходимлари ва фуқаролар ўртасидаги салбий ҳолатлар акс эттирилган 201 та видеоролик ижтимоий тармоқларда кенг муҳокамага сабаб бўлган.
Кадрлар бош бошқармаси ҳамда Ўз хавфсизлик бўлинмалари билан ҳамкорликда ҳар битта ҳолат бўйича текшириш ўтказиб, 87 нафар ходимга нисбатан интизомий жазо чораси қўлланилган. Шундан 8 нафари ички ишлар тизимидан бўшатилган. 20 нафари эса эгаллаб турган лавозимидан озод этилган», – дейди Авазбек Инъомов.
Шунингдек, 201 та видеороликдан 84 та ҳолатда ходимлар айби тасдиқланмаган ва 22 та ҳолат бўйича фуқароларга нисбатан маъмурий жавобгарлик, 9 та ҳолатда жиноий иш қўзғатилгани маълум қилинди.
Аввалроқ Бухорода ЙПХ инспекторини Тicо капотида судраб кетган ҳайдовчи 15 суткага қамалгани, Тошкентда маст ҳолда автомобиль бошқариб, ЙПХ ходимлари билан жанжал уюштирган собиқ депутат жаримага тортилгани ҳамда Термизда хизмат машинасида йўл қоидасини бузган ЙПХ ходими жаримага тортилгани ҳақида хабар берилганди.
Изоҳ (0)