“Daryo”da e’lon qilingan “Shahrisabz shahridagi ‘roddom’ning bir qismi sotilgani aytildi. Shaharning yosh hokimi esa masalaga oydinlik kiritdi” sarlavhali maqolaga viloyat sog‘liqni saqlash boshqarmasi munosabat bildirdi.
Ma’lum qilinishicha, shahar tibbiyot birlashmasiga qarashli tug‘ruq bo‘limi sotilmagan, ijaraga berilgan.
“Shahrisabz shahar tug‘ruq kompleksining 150 o‘ringa mo‘ljallangan binosi 1984-yilda qurilib, foydalanishga topshirilgan. Bino 2005-yilda qayta ta’mirlangan. Tug‘ruq kompleksining barcha bloklari qayta ta’mirga muhtoj bo‘lishiga qaramay, 2016-yilda faqat 1-bloki qayta ta’mirlangan.
Shahrisabz shahri 2018-yil tumandan alohida ajralib chiqqanidan keyin shahar tibbiyot birlashmasi shifoxonasi 345 o‘rinli shifoxona sifatida faoliyat boshladi. Tug‘ruq bo‘limi ayni paytda yuqoridagi videomurojaatda aytilganidek 140 o‘rinli emas, balki 65 o‘rinli hisoblanadi. Shuningdek, tug‘ruq kompleksida ginekologiya bo‘limida 15, homiladorlar patologiyasi bo‘limida 30 o‘rin mavjud”, — deyiladi boshqarma axborot xizmati munosabatida.
Boshqarma mas’ullarining ta’kidlashicha, tuman tug‘ruq kompleksi 2018-yil 5-iyuldan joriy ta’mirlashga yopilgani sababli shahar tug‘ruqxonasidagi ta’mirtalab, shu kungacha faoliyat ko‘rsatmaydigan binoda shahar davlat sanitariya-epidemiologiya nazorati markazi ruxsati bilan tuman hududidagi homilador ayollarni qabul qilish uchun vaqtincha, faqatgina 3 oy mobaynida tibbiy xizmat tashkil etilgan.
“Videomurojaatda qayd etilgan tug‘ruqxona binosining bir qismi sotib yuborildi, degan da’volar mutlaqo asossiz. 2019-yil yanvar oyida shahar tibbiyot birlashmasi 3 yildan buyon foydalanilmasdan kelgan ta’mirtalab binoning 1-qavatidagi 27,25 kvadrat metr joyi shoshilinch tibbiy yordam bo‘limi vrachi M.Egamberdiyevga 5 yillik shartnoma bilan hamda 141,22 kvadrat metr joyi videomurojaatda aytilganidek I.Mansurovga emas, balki akusher-ginekolog F.Qurbonovaga qonuniy tarzda xususiy sherikchilik asosida ishlash uchun 1 yillik shartnoma bilan ijaraga berilgan. 2020-yil 22-yanvar oyidan Shahrisabz shahar tibbiyot birlashmasi ma’muriyati tomonidan shartnoma yana 5 yilga uzaytirilgan”, — deya ma’lumot beradi boshqarma axborot xizmati.
Qo‘shimcha qilinishicha, 2019-yilda Shahrisabz shahar tug‘ruq kompleksi binosini ta’mirlash uchun mahalliy budjetdan 3 milliard so‘m ajratilgan. Tug‘ruq bo‘limi binosining 2-bloki tom qismi almashtirilishi boshlanganidan keyin ta’mirlash ishlari to‘xtab qolgan. 2021-yilda mazkur binoni to‘liq rekonstruksiya qilish va qo‘shimcha bino qurish bo‘yicha takliflar tegishli idoralarga taqdim etilgan.
Eslatib o‘tamiz, avvalroq tug‘ruqxona hamshirasi shaharni 10 kun muddatga boshqargan yosh hokimiga murojaat qilib, “Shifokorlarning dardi ko‘p. Eng asosiy muammo ‘roddom’ning sotilgani bo‘ldi. Shu paytga qadar ‘roddom’ sotilmagandi. Lekin 2018-yil sotildi. Biz bu haqda tegishli tashkilotlarga murojaat qildik. Hatto deputatlarga ham bu haqda xabar berib, ularni muammodan boxabar qildik. Ammo muammo haligacha yechilmay qolmoqda”, degandi. Tug‘ruq bo‘limi boshlig‘i Shokir Umarov esa bo‘lim 140 koykali ikki blokdan iborat bo‘lib, birinchi blogining bir qavati shahar tibbiyot birlashmasida faoliyat yurituvchi ikki nafar shifokorga, tadbirkor sifatida ijaraga berilganini ma’lum qilgandi.
Izoh (0)