Qozog‘iston prezidenti Qosim-Jo‘mart To‘qayev qozog‘istonlik haydovchilarga haydovchilik va transport vositalarini qayd qilish guvohnomasini (texpasport) olib yurmaslik huquqini beruvchi qonunni imzoladi, deya xabar berdi Tengrinews.
“Davlat rahbari ‘Qozog‘iston Respublikasining ayrim qonun hujjatlariga yo‘l harakati masalalari bo‘yicha o‘zgartirish va qo‘shimchalar kiritish to‘g‘risida’gi qonunni imzoladi”, — deyiladi xabarda.
Haydovchi guvohnoma yoki “texpasport”ini uyda unutib qoldirgani uchun to‘laydigan jarima bekor qilinadi.
Shunga ko‘ra, qozog‘istonlik haydovchilar o‘zlari bilan ushbu hujjatlarni olib yurmasliklari mumkin. Ichki ishlar organlari haydovchining shaxsini tasdiqlovchi guvohnomasiga qarab elektron ma’lumotlar bazasi orqali uning hujjatlari bor yoki yo‘qligini tekshiradi.
O‘zgarishlar chet elliklarga taalluqli emas, ular haydovchilik guvohnomasi va “texpasportlar”ni o‘zlari bilan olib yurishi shart.
Qonun rasman e’lon qilingan dastlabki kundan boshlab 10 kalendar kun o‘tgandan keyin kuchga kiradi. Ayni paytda qonun hali rasman e’lon qilinmagan.
Avvalroq Qozog‘istonning korrupsiyaga qarshi kurashish agentligi raisi Alik Shpekbayev amaldorlarga kichik va o‘rta darajadagi korrupsion jinoyatlari uchun jazo sifatida jamoat ishlariga tayinlash, xususan, ko‘chalarni tozalatish taklifi bilan chiqqandi.
Yanvar oyi boshida esa Qozog‘iston o‘lim jazosini rasman bekor qildi. Mamlakat prezidenti bu boradagi tegishli qonunni imzoladi.
Izoh (0)