Qozog‘istonda 1-fevraldan aholini koronavirusga qarshi emlash boshlandi. Tengrinews nashri ushbu emlashga bog‘liq ma’lumotlarni taqdim etdi.
Mamlakat aholisi “Sputnik V” vaksinasi bilan emlanmoqda. Hozirda Rossiyaning vaksinasi Qozog‘istondagi Qarag‘anda farmatsevtika majmuasi tomonidan ishlab chiqarilmoqda.
Shu bilan birga, Qozog‘iston tomonidan ishlab chiqilgan QazCovid-in vaksinasi bilan aholi ommaviy ravishda 2021-yil mart oyidan boshlab emlandi. Bu vaksina hozirda klinik sinovlardan o‘tkazilmoqda.
Sog‘liqni saqlash vaziri Aleksey Soyning so‘zlariga ko‘ra, emlash bosqichma-bosqich amalga oshiriladi.
Birinchi bosqichda yuqumli kasalliklar shifoxonalari, shoshilinch tibbiy yordam xizmatlari, intensiv terapiya bo‘limlari, birlamchi tibbiy-sanitariya yordami, shoshilinch tibbiy yordam, sanitariya-epidemiologiya xizmati xodimlaridan iborat yuz mingga yaqin odam 2021-yil 1-fevraldan boshlab ushbu vaksina bilan emlanadi.
Ikkinchi bosqichda 2021-yilning mart oyidan 150 mingga yaqin umumta’lim maktab hamda universitet o‘qituvchilari va tibbiy xizmat xodimlari emlanadi.
Uchinchi bosqichda maktab-internatlar, maktabgacha ta’lim muassasalari o‘qituvchilari, o‘quvchilar, surunkali kasalliklarga chalingan odamlar aprel oyidan boshlab vaksina qabul qiladi. Keyin bosqichma-bosqich, 2021-yil oxiriga qadar olti millionga yaqin qozog‘istonlikni emlash rejalashtirilgan.
Sog‘liqni saqlash vazirligining ma’lumotlariga ko‘ra, emlash ixtiyoriy ravishda faqat emlanadigan kishining roziligi bilan amalga oshiriladi. Qozog‘istonning “Odamlar salomatligi va sog‘liqni saqlash tizimi to‘g‘risida”gi kodeksining 77-moddasiga muvofiq, qozog‘istonliklar profilaktika vaksinalarini olishdan bosh tortish huquqiga ega.
Shuningdek, mamlakatda elektron emlash pasportlarini joriy etish rejalashtirilgan. Elektron emlash pasporti – bu profilaktik emlashlar olinganligini tasdiqlovchi hujjat. Unda odam qanday dori-darmonlarni qabul qilgani, qaysi dozalarda, qaysi sanalarda bo‘lgani va emlashdan keyin qandaydir nojo‘ya ta’siri bo‘lgani to‘g‘risida ma’lumotlar mavjud bo‘ladi. Biror kishi koronavirusga qarshi vaksinani qabul qilishi bilanoq bu haqda ma’lumot eGov mobil ilovasida aks etadi.
Sog‘liqni saqlash vaziri Aleksey Soy dastlab emlash barcha qozog‘istonliklar uchun bepul bo‘lmaydi, dedi. Shifokorlar, o‘qituvchilar va huquqni muhofaza qilish organlari xodimlaridan tashqari, barcha uchun vaksina pullik bo‘lishi ta’kidlandi.
Biroq, keyinchalik mamlakat sog‘liqni saqlash vazirining birinchi o‘rinbosari Marat Shoranov qozog‘istonliklar bepul tibbiy yordamning kafolatlangan hajmi doirasida emlanishlari mumkinligini ma’lum qildi.
Jon Hopkins universitetining ma’lumotlariga ko‘ra, Qozog‘istonda 235 844 ta koronavirus bilan bog‘liq holat aniqlangan. Bemorlarning 3046 nafari vafot etgan.
Avvalroq Qirg‘iziston saqlash sharoitlarini ta’minlay olmasligi sababli Pfizer vaksinasidan voz kechgani, Qozog‘istonliklar koronavirus tufayli kiritilgan cheklovlar ustidan yana sudga murojaat qilgani hamda mamlakat koronavirus tarqalishi bo‘yicha “sariq” zonaga o‘tgani haqida xabar berilgandi.
Izoh (0)