Koronavirusga qarshi kurashish shtabi a’zosi Nurmat Otabekov O‘zbekistonga koronavirusning “britancha” shtammi kirib kelishi qat’iy karantinga qaytishga asos emasligini bildirdi, deya xabar bermoqda “Kun.uz”.
“Aynan hozirgi holat bo‘yicha karantin qaytishiga umuman asos yo‘q, deb hisoblaymiz. Agar haddan ortiq xotirjamlikka berilsak, hammamiz O‘zbekistonni tashlab, chet davlatlarda sayr qilishni boshlasak, kasallikning katta oqimda kelishiga yo‘l qo‘yib beradigan bo‘lsak, cheklovlar kiritilishiga asos bo‘lishi mumkin.
Xalqimiz mutaxassislarning tavsiyalariga to‘g‘ri rioya qilib, hayot tarzini shakllantirsa, jiddiy karantinga ro‘baro‘ kelmaymiz.
Hozirda ba’zi davlatlar qayta karantinga kiryapti, ba’zilari esa cheklovlarni yumshatyapti. Nima bo‘lganda ham vaziyatga qarab ish tutiladi”, – dedi Nurmat Otabekov.
Mavzuga doir: “Agar cheklovlarga rioya qilmasak, karantin kuchaytirilishi mumkin” — Bahodir Yusupaliyev
“Ta’lim muassasalari yopilishi bo‘yicha umuman fikr yo‘q. Karantin tadbirlari joriy qilinarkan, xavf ostida bo‘lgan guruhga alohida e’tibor beriladi. Shuning uchun ham mabodo karantinga ehtiyoj bo‘lsa, aholining qaysi qatlami xavf guruhida ekanligini aniqlab, bir qarorga kelinadi”, – deya ta’kidladi shtab a’zosi.
Avvalroq Otabekov koronavirusning “britancha” shtammining odamlar orasiga kirishiga yo‘l qo‘yilmaganini ma’lum qilgan edi.
Eslatib o‘tamiz, 30-yanvar kuni koronavirusning “britancha” shtammi O‘zbekistonga kirib kelgani ma’lum bo‘ldi. U 23-yanvar kuni Dubaydan qaytib kelgan 10 yoshli qizchada aniqlangan. SSV esa koronavirusning yangi shtammi aniqlangan qizcha haqida nima uchun 1 haftadan keyin e’lon qilinganiga izoh berdi.
Izoh (0)