ЮНИСЕФ Ўзбекистонга ижтимоий ҳимояни мустаҳкамлаш учун ускуналар совға қилди

Молия вазирлигида 2021 йил 29 январь куни Ўзбекистонда ижтимоий ҳимояни мустаҳкамлашга бағишланган йиғилиш бўлиб ўтди ва унда Молия вазири ўринбосари Аҳадбек Ҳайдаров ва ЮНИСЕФнинг Ўзбекистондаги вакили Мунир Маммадзода иштирок этди. Бу ҳақда вазирлик матбуот хизмати «Дарё»га хабар қилди.

Таъкидланишича, Ўзбекистон ЮНИСЕФ билан биргаликда ижтимоий ҳимоя дастурларини, жумладан, коронавирус пандемияси каби инқирозлар оқибатларини олдини олишга қаратилган ижтимоий ёрдам дастурларини янада кенгроқ бошқарадиган ягона реестрнинг ахборот тизимини такомиллаштириш устида иш олиб бормоқда.

Молия вазирлиги ва ЮНИСЕФ ўртасидаги техник ёрдам доирасида Ўзбекистон Республикаси Молия вазирлиги ҳузуридаги бюджетдан ташқари пенсия жамғармасига 300 донадан ортиқ офис жиҳозлари топширилди. Булар ижтимоий ҳимоянинг ягона реестри, ижтимоий нафақаларни электрон тарқатиш жараёнини оптималлаштириш имконини берувчи ахборот тизими ишини такомиллаштириш учун фойдаланилади.

Маълум қилинишича, ўтказилган жиҳозлар бўлинмалари Ўзбекистоннинг барча ҳудудларидаги бюджетдан ташқари пенсия жамғармасининг туман ва шаҳар офислари ўртасида тақсимланади, шу тариқа тизимга тенг киришни таъминлаш ҳамда бутун мамлакат бўйлаб дастур жараёнларини такомиллаштириш имконини беради.

Молия вазири ўринбосари Аҳадбек Ҳайдаров ЮНИСЕФ билан ҳамкорлик Ўзбекистонда ижтимоий ҳимоя тизимини ривожлантириш ва такомиллаштириш жараёнида муҳим нуқталардан бири эканини таъкидлади. Ушбу дастурнинг мақсади – миллий ривожланиш стратегиясини, жумладан, Барқарор ривожланиш мақсадларини молиялаштиришнинг умумий тизимини мустаҳкамлашга кўмаклашиш экани айтилди.

Халқаро тажриба ва салоҳиятга эга ЮНИСЕФ Ўзбекистон ҳукуматига барча аҳоли учун мавжуд бўлган кенг қамровли ижтимоий таъминот тизимини яратишда муҳим ёрдам беради ва шу билан инсон капиталининг янада инклюзив иқтисодий ўсиши ва ривожланишига ҳисса қўшади ва барқарор ривожланишга эришишни тезлаштиради.

«Биз ушбу ускуналарни Молия вазирлигига топширишдан мамнунмиз ва муҳтож оилаларга ҳамда болаларга нақд пул ёрдамини адолатли тақсимлашни самарали бошқаришга олиб келадиган ягона реестрнинг фаолиятини кенгайтиришга ёрдам берамиз.

Дарҳақиқат, биргаликдаги саъй-ҳаракатларимиз, шу жумладан, Ягона реестрни доимий қўллаб-қувватлашимиз миллий ижтимоий ҳимоя тизимининг ҳисобдорлиги ва шаффофлигини оширишга, қамров ва самарадорликни оширишга олиб келади деб ўйлаймиз», – деди ЮНИСЕФнинг Ўзбекистондаги вакили Мунир Маммадзода.

Ижтимоий ҳимоя ягона реестри дастлаб 2019 йилда Сирдарё вилоятида ишга туширилди. 2020 йилнинг охирига қадар мамлакатнинг барча ҳудудларида рўйхатга олиш китоби жойлаштирилди. Ҳозирда Ягона реестрда кам таъминланган, болали оилалар учун ижтимоий нафақалар қамраб олинган.

Учрашув якунида томонлар ижтимоий ҳимоя дастурларини такомиллаштириш ва яна-да қўллаб-қувватлашда Молия вазирлиги ва ЮНИСЕФ ўртасидаги ҳамкорлик ҳамда Ўзбекистонда ягона реестрнинг муҳим ўрни ва аҳамиятини қайд этди.

Аввалроқ ЮНИСЕФ Ўзбекистон ҳукуматининг болаларни мактабга қайтариш ҳақидаги қарорини маъқуллагани ҳақида хабар берилганди.